“Qonunchilik hujjatlari va ularning loyihalarini tartibga solish taʼsirini baholash tizimi” bo‘yicha 2024-yil yakunlari yuzasidan axborot
2025-02-12 14:50:00 / Vazirlik yangiliklari
Mazkur axborotda O‘zbekistonda qonunchilik hujjatlarini tartibga solish taʼsirini baholash (TSTB) tizimining joriy etilishi, rivojlanishi va 2024-yilda amalga oshirilgan ishlar yuzasidan ma’lumotlar qamrab olingan. TSTB tizimi 2021-yilda norma ijodkorligini takomillashtirish konsepsiyasi doirasida boshlangan bo‘lib, davlat boshqaruvi va qonunchilik samaradorligini oshirish va tadbirkorlik muhitini yaxshilashga xizmat qiladi.
Axborotda qonunchilik hujjatlari loyihalarini va amaldagi hujjatlarni baholash natijalari, tizimni takomillashtirish bo‘yicha amalga oshirilgan islohotlar va xalqaro hamkorlik masalalari yoritilgan. Xususan, 2024-yil yakunlariga ko‘ra, TSTB hisoboti bilan taqdim etilgan normativ-huquqiy hujjatlar loyihalarining ulushi 77 foizga yetgan. Shu bilan birga, tizimni rivojlantirishda xirijiy tajriba, jumladan, Iqtisodiy hamkorlik va taraqqiyot tashkiloti (OECD), Buyuk Britaniya, AQSH, Janubiy Koreya, Birlashgan Arab Amirliklari va Finlyandiya tajribalari o‘rganilmoqda.
Shuningdek, axborotda Adliya vazirligi tomonidan huquqiy tartibga solish jarayonlarini yanada takomillashtirish, TSTBning yangi tartibini joriy etish, davlat organlari faoliyatini reytingini yuritish va rag‘batlantirish kabi tashabbuslar ilgari surilgani qayd etilgan. Xususan, 2025-yildan boshlab barcha qonunchilik hujjatlari loyihari konsepsiyasi soddalashtirilgan tarzda, yuqori ijtimoiy-iqtisodiy ta’sirga ega loyihalar esa kengaytirilgan tartibda TSTBdan o‘tkazilishi belgilangan.
Umuman olganda axborot TSTB tizimidagi o‘zgarishlar, muammolar, erishilgan natijalar va kelgusidagi rejalarga oid batafsil ma’lumotlarni o‘z ichiga oladi.
