Huquqiy bilim jamiyatning har bir aʼzosida boʻlsin: Qoraqalpogʻistondagi “Adliya sayli”dan eksklyuziv
2024-09-19 12:05:00 / Vazirlik yangiliklari
Bugun davlat va jamiyat hayotining barcha jabhalarida, shu jumladan inson huquqlari va erkinliklarini taʼminlash, jamiyatda huquqiy ong va huquqiy madaniyatni yuksaltirish hamda Qonun ustuvorligini taʼminlash va qonuniylikni mustahkamlash eng muhim vazifalardan biridir. Ayni paytda umuminsoniy qadriyatlar va umumeʼtirof etilgan huquq andozalariga asoslangan, shaklan va mohiyatan yangi qonunlar qabul qilinmoqda. Ularning asosida qonuniylik, demokratizm, odillik, insonparvarlik kabi eng zarur prinsiplar yotadi. Bular esa jamiyatning har bir aʼzosiga yetib borishi, har bir xonadonga kirib borishi kerak. Aholining barcha qatlamlari huquqiy savodxonligini oshirish, yuksak darajadagi huquqiy ongga ega boʻlishlari hamda huquqiy bilimlarini kundalik hayotda qoʻllay olishlari bugun juda muhim.
“Mamlakat kelajagi — qonunga itoatkor va huquqbuzarlikka toqatsiz yoshlar bilan” gʻoyasi asosida yoshlar oʻrtasida huquqbuzarliklarga nisbatan murosasizlik munosabatini shakllantirish, ularda qonunlarga hurmat, mamlakat taqdiriga daxldorlik hamda vatanparvarlik hissini kuchaytirishga qaratilgan kompleks huquqiy targʻibot tadbirlarini tashkil qilish ham ayni paytda dolzarb ahamiyatga ega boʻlib turibdi.
Shu maqsadda Adliya vazirligi tomonidan mamlakatimizning turli hududlarida odamlarga huquqini anglatish mezoniga asoslangan tadbirlar tez-tez tashkil etiladi. Qoraqalpogʻiston Respublikasi Adliya vazirligi ishchi guruhi tashabbusi bilan 18-sentyabr kuni Nukus shahridagi Mono markazda oʻtkazilgan “Adliya sayli” huquqiy aksiyasida ham aholining katta qatlami qamrab olindi.
Hayotning barcha tashvishlarini chetga surib, shunchaki sayr uchun chiqqan fuqarolarni advokatlar, notariuslar, sud tizimi hamda nodavlat notijorat tashkilotlari vakillari, huquqni muhofaza qilish organlari xodimlari qarshi oldi. Odamlar yana hayot tashvishlariga qaytgan boʻlsada, anchadan beri tinchlik bermayotgan oʻylari, muammolaridan qutilish, ularga yechim topish imkoniyati yuzaga kelgan edi. Barcha sohalar boʻyicha berilayotgan bepul huquqiy maslahatlar hamma uchun ayni muddao boʻldi.
Sayilga fuqarolar, adliyaga biriktirilgan yoshlar, Nukus shahrida joylashgan barcha oliy oʻquv yurtlari, texnikumlar, maktablar, Ichki ishlar akademiyasi, Temurbeklar maktabidan jami 2000 ga yaqin aholi tashrif buyurdi.
Dastlab, tadbir “Salomatlik uchun besh ming qadam” loyihasi bilan boshlanib, loyiha ishtirokchilari manzilga yetib kelganidan soʻng davlatimiz madhiyasi yangradi.
Shundan soʻng, sayil davomida sovrinli viktorinalar, sport musobaqalari, madaniyat xodimlarning konsert dasturi, nogironligi boʻlgan shaxslar tomonidan tayyorlangan mahsulotlar yarmarkasi, Hunarmandlar uyushmasi koʻrgazmasi, sayyor qabullar, mehnat yarmarkalari, harbiy chiqishlar namoyish etilib, aholiga tibbiy xizmatlar koʻrsatildi, shuningdek, psixolog maslahatlari ham berildi.
Sayil davomida Mudofaa boshqarmasi orkestrlari va madaniyat xodimlarining konsert dasturi, sportchi yoshlar tomonidan sportning karate, gimnastika va dzyudo turlari boʻyicha chiqishlari namoyish etildi. Nogironligi boʻlgan shaxslar tomonidan tayyorlangan mahsulotlar yarmarkasi, Hunarmandlar uyushmasi koʻrgazmasi, X.Sulaymanova nomidagi sud ekpertizasi hududiy boʻlimi va Ichki ishlar vazirligiga tegishli xizmat buyumlari koʻrgazmasi boʻlib oʻtdi.
Davlat xizmatlari markazi tomonidan sayyor tartibda 20 dan ortiq davlat xizmatlari koʻrsatildi. Ayniqsa, fuqarolar O.Aytыmbetov va Sh.Qыdыrbayevalarning turmush qurib, 8 oydan beri birga yashab kelayotganligi, ammo nikohi qayd etilmaganligi muammosi bilan qilgan murojaati tez fursatda oʻrganilib, yosh oilaning xursandchiligiga sabab boʻldi. Shu yerning oʻzida FHDYO boʻlimi tomonidan ularga nikoh tuzilganligi toʻgʻrisidagi guvohnomasi, M.Mambetaliyev va N.Asanovalarga esa farzandlarining tugʻilganligi haqidagi guvohnomalari topshirildi.
Eʼtiborlisi, sayyor qabulda aholi tomonidan 40 ga yaqin murojaatlar kelib tushgan boʻlsa, shundan 12 tasi shu yerning oʻzida hal qilindi va 28 tasi nazoratga olindi.
Tizimda xotin-qizlar, shu jumladan nogironligi boʻlgan ayollarga yaratib berilayotgan imkoniyatlarni yanada kengroq tushuntirish maqsadida mahallalarda yetakchi mutaxassislarni jalb qilgan holda “Ayollarga imtiyozlar” mavzusida suhbatlar tashkil qilib boriladi. Shuningdek, psixologlar, otinoyilar va boshqa ijtimoiy faol xotin-qizlarni jalb qilgan holda mahallalardagi ayollar oʻrtasida farzandlar tarbiyasi, oilaviy totuvlik, huquq va axloq mavzularida uchrashuvlar, profilaktik suhbatlar oʻtkaziladi.
Shuni alohida taʼkidlash kerakki, adliya tizimida yoshlar bilan ishlash masalasi har doim muhim oʻrinlarda turadi. Adliya vazirligi tomonidan otaliqqa olingan yoshlar bugun 500 nafarni tashkil qilmoqda. Ular bilan manzilli ishlash maqsadida adliya organlariga biriktirilgan 1 070 MFYda istiqomat qiluvchi 424 494 nafar yoshlarga 2 355 nafar adliya organlari xodimlari biriktirilgan. 339 402 nafar yoshlar bilan uchrashilib, anketalar va “yoʻl xarita”lar shakllantirilgan. Ushbu uchrashuvlar davomida yoshlarning 33 124 ta muammolari aniqlanib, shundan 19 748 nafar yoki 60 foiz yoshlarning muammolari ijobiy hal qilindi.
“Adliya sayli” yana ham qizgʻin tus olishi, aynan yoshlarga yana koʻtarinki kayfiyat ulashish, intellekt va bilimini oshirish maqsadida sayl davomida tadbirga tashrif buyurgan yoshlar oʻrtasida intellektual oʻyinlar ham oʻtkazildi.
“Zakovat” intellektual oʻyinida 1-oʻrinni “Temurbeklar” jamoasi, 2-oʻrinni “Adolat” jamoasi, 3-oʻrinni “Veterinariya” jamoasi egalladi va gʻolib boʻlgan ishtirokchilar vazirlik tomonidan tayyorlangan diplom hamda sovgʻalar bilan taqdirlandi.
Bunday tadbirlarning amalga oshirilishi aholining, ayniqsa, yoshlarning huquqiy savodxonligini yanada oshirishga, yoshlarda vatanparvarlik tuygʻularini yanada kuchaytirishga, ularning boʻsh vaqtlarini mazmunli oʻtkazish, sogʻlom turmush tarzini mustahkamlashga, madaniy dam olishlariga xizmat qiladi.