Murojaatlar bilan ishlash boʻyicha konferensiya tashkil etildi
2024-09-17 11:55:00 / Vazirlik yangiliklari
Bugun, 17-sentabr kuni Adliya vazirligida Yuristlar malakasini oshirish markazi tomonidan “Murojaatlar bilan ishlash samaradorligini taʼminlash: nazariya va amaliyot” mavzusida ilmiy-amaliy konferensiya tashkil etildi.
Konferensiyadan koʻzlangan maqsad – davlat organlari va tashkilotlarida jismoniy va yuridik shaxslarning murojaatlari bilan ishlash samaradorligiga hissa qoʻshish, murojaatlar bilan ishlashga masʼul xodimlarni bu borada qonunchilikdagi yangiliklardan boxabar qilish, murojaatlarga doir qonunchilikdagi muammoli holatlarni ilmiy-nazariy jihatdan tahlil qilish hamda mutaxassislar va keng jamoatchilik oʻrtasida oʻzaro tajriba almashinuvi maydonini yaratishdan iborat.
Tadbirda adliya vaziri oʻrinbosari Sh. Rabiyev soʻzga chiqib, birgina Oʻzbekiston Respublikasi Prezidenti virtual qabulxonasiga platforma ishga tushgan vaqtdan boshlab qariyb 10 millionga yaqin murojaat kelib tushganligini taʼkidladi. Bu esa davlat organlari va tashkilotlarining jismoniy va yuridik shaxslarning murojaatlari bilan ishlovchi masʼul xodimlaridan yanada katta masʼuliyat va bilim talab etadi.
Bu borada Vazirlar Mahkamasining 2022-yil 7-oktabrdagi qarori bilan davlat organlari va tashkilotlarining murojaatlar bilan ish olib boruvchi xodimlari malakasini oshirish tizimi yoʻlga qoʻyildi. Adliya vazirligi qoshidagi Yuristlar malakasini oshirish markazi va uning filiallarida ushbu qaror ijrosi yuzasidan 2024-yilning birinchi yarmida davlat organlari va tashkilotlarining jismoniy va yuridik shaxslarning murojaatlari bilan ish olib boruvchi 1 835 nafar masʼul xodimlarning sohaga oid malakasi oshirildi.
Shuningdek, konferensiya doirasida “Jismoniy va yuridik shaxslarning murojaatlari toʻgʻrisida”gi Qonunga sharh va “Jismoniy va yuridik shaxslarning murojaatlari bilan ishlash tartibi” nomli kitobning taqdimoti boʻlib oʻtdi.
Adliya vazirligi
Axborot xizmati