O‘zbеkistоn Rеspublikаsi Yoshlar ishlari agentligi

O‘zbekiston Respublikasi Prezidentining

Qarori

Yoshlarni xorijiy tillarga o‘qitish tizimi samaradorligini oshirish bo‘yicha qo‘shimcha chora-tadbirlar to‘g‘risida

Mamlakatimizda yoshlarni qo‘llab-quvvatlash tizimini yanada takomillashtirish, ilmli va ma’rifatli yoshlarni kamol toptirish, ulg‘ayib kelayotgan yosh avlodning ijodiy va intellektual qobiliyatlarini rivojlantirish, xorijiy tillarga o‘qitishni yanada ommalashtirish, shuningdek, bunday faoliyat bilan shug‘ullanuvchi subyektlarni qo‘llab-quvvatlash va rivojlanishi uchun qulay muhit yaratish maqsadida:

1. Yoshlar ishlari agentligi zimmasiga quyidagi qo‘shimcha funksiyalar yuklansin:

yoshlarni xorijiy tillarga o‘qitish jarayonlarini takomillashtirish, talab yuqori bo‘lgan chet tillarini mukammal o‘zlashtirish uchun sharoitlarni kengaytirish;

xorijiy tillarni o‘qitish faoliyati bilan shug‘ullanuvchi yakka tartibdagi tadbirkorlar, o‘zini o‘zi band qilgan shaxslar hamda nodavlat ta’lim tashkilotlari (keyingi o‘rinlarda — xususiy o‘quv markazlari), ushbu yo‘nalishda faoliyat yurituvchi boshqa nodavlat notijorat tashkilotlarini rivojlantirish va qo‘llab-quvvatlash, sohadagi muammolarni muntazam ravishda tahlil qilish va ularning yechimi bo‘yicha takliflar tayyorlash;

xususiy o‘quv markazlari reytingini shakllantirish hamda reytingda yuqori o‘rinni egallaganlarni rag‘batlantirish;

yoshlar orasida kasb-hunar va xorijiy tillarni o‘rganishni targ‘ib qilish, ushbu yo‘nalishdagi ijtimoiy loyihalar, ko‘rik-tanlov va olimpiadalarni tashkil etish.

2. Belgilansinki:

imtihon topshirish xarajati qoplanadigan xalqaro imtihon tizimlari bo‘yicha ingliz, nemis, fransuz, koreys, xitoy va yapon tillaridan kamida S1 yoki unga tenglashtirilgan mos darajadagi sertifikat olgan yoshlarni imtihon topshirish xarajatlarini kompensatsiya qilishga qo‘shimcha ravishda Yoshlar ishlari agentligiga ajratilgan mablag‘lar doirasida o‘qish xarajatlarini qoplash uchun bazaviy hisoblash miqdorining uch baravari miqdorida bir martalik moddiy rag‘batlantirish tizimi joriy etiladi;

2024-yil 1-sentabrdan boshlab 2027-yil 1-yanvarga qadar yoshlarning nemis, fransuz, koreys, xitoy va yapon tillari bo‘yicha xalqaro imtihon tizimlarida imtihon topshirish xarajatlari qoplab berilishi uchun ular tomonidan to‘planishi lozim bo‘lgan ballning (sertifikat darajasining) minimal ko‘rsatkichi bir pog‘ona pasaytiriladi hamda mazkur xarajatlar Yoshlar ishlari agentligiga ajratilgan mablag‘lar doirasida qoplanadi.

3. Belgilab qo‘yilsinki, umumiy o‘rta ta’lim muassasalarining sinf xonalarini ta’lim jarayonidan bo‘sh vaqtda kasb-hunar va xorijiy tillarni o‘qitish faoliyatini amalga oshirish uchun to‘g‘ridan-to‘g‘ri shartnomalar asosida tekin foydalanish huquqi bilan xususiy o‘quv markazlariga berishga ruxsat etiladi.

Bunda tegishli umumiy o‘rta ta’lim muassasalarining ro‘yxati Maktabgacha va maktab ta’limi vazirligi tomonidan tasdiqlanadi, shuningdek, tekin foydalanish to‘g‘risidagi shartnoma balansda saqlovchi va xususiy o‘quv markazi o‘rtasida tuziladi.

4. Maktabgacha va maktab ta’limi vazirligi Davlat aktivlarini boshqarish agentligi bilan birgalikda 2024-yilda kamida 1 mingta umumiy o‘rta ta’lim muassasasining sinf xonalarini xususiy o‘quv markazlariga kasb-hunar va xorijiy tillarni o‘qitish faoliyatini amalga oshirish uchun tekin foydalanishga bersin.

Bunda sinf xonalarini ijaraga olgan xususiy o‘quv markazlari tomonidan tegishli umumiy o‘rta ta’lim maktablarida o‘qiyotgan “Ijtimoiy himoya yagona reyestri”ga kiritilgan oilalar farzandlari bo‘lgan yuqori sinf o‘quvchilari, biroq o‘quv kurslarida tahsil oluvchilar umumiy sonining 20 foizidan ortiq bo‘lmagan miqdorda bepul o‘qitiladi.

5. Shunday tartib o‘rnatilsinki, unga muvofiq:

a) 2024-yil 1-oktabrdan boshlab:

Yoshlar ishlari agentligi har yili xususiy o‘quv markazlarining Qoraqalpog‘iston Respublikasi, viloyatlar va Toshkent shahri kesimidagi reytingini tuzadi hamda rasmiy veb-saytida e’lon qilib boradi;

reyting natijalariga ko‘ra olis va chekka hududlarda faoliyat ko‘rsatuvchi eng yuqori ko‘rsatkichga ega 100 ta xususiy o‘quv markazining ta’lim jarayonida foydalanadigan bino va inshootlar uchun ijara to‘lovi xarajatlarining bir qismi Yoshlarga oid davlat siyosatini qo‘llab-quvvatlash jamg‘armasi mablag‘lari hisobidan kompensatsiya qilinadi;

b) 2024 — 2026-yillarda oliy ta’lim tashkilotlarining xorijiy til filologiyasi ta’lim yo‘nalishi bo‘yicha 3 va 4-kursda tahsil olayotgan hamda kamida S1 darajadagi sertifikatga ega talabalariga umumiy o‘rta, o‘rta maxsus va professional ta’lim tashkilotlarida o‘qituvchi sifatida mehnat faoliyatini amalga oshirishiga ruxsat etiladi.

6. Yoshlar ishlari agentligi Qoraqalpog‘iston Respublikasi Vazirlar Kengashi va viloyatlar hokimliklari bilan birgalikda 2024-yil 1-oktabrga qadar mazkur qarorning 5-bandi “a” kichik bandida ko‘zda tutilgan choralarni amalga oshirish maqsadida olis va chekka hududlar ro‘yxatini tasdiqlasin hamda rasmiy veb-saytida e’lon qilsin.

7. Quyidagilar:

a) Oliy ta’lim, fan va innovatsiyalar vazirligi, Maktabgacha va maktab ta’limi vazirligi hamda Yoshlar ishlari agentligi 2024-yil 1-oktabrga qadar nemis, fransuz, koreys, xitoy va yapon tillari bo‘yicha tan olinadigan xalqaro imtihon tizimlari va ular tomonidan beriladigan sertifikatlar ro‘yxatini kengaytirish bo‘yicha Vazirlar Mahkamasiga taklif kiritsin;

b) Maktabgacha va maktab ta’limi vazirligi, Oliy ta’lim, fan va innovatsiyalar vazirligi 2024/2025 o‘quv yilidan boshlab:

ota-onalar va o‘quvchilar talabidan kelib chiqib, ixtisoslashtirilgan maktablar va kasb-hunar maktablarida amaldagi tayanch o‘quv rejasidagi soatlar doirasida chet tili sifatida nemis, fransuz, koreys, xitoy va yapon tillarini o‘qitishni yo‘lga qo‘ysin;

A. Avloniy nomidagi pedagogik mahorat milliy instituti, Qoraqalpog‘iston Respublikasi va viloyatlar pedagogik mahorat markazlarida ingliz tilidan tashqari boshqa xorijiy tillar bo‘yicha ham bosqichma-bosqich pedagoglarni qayta tayyorlash kurslarini tashkil qilsin;

v) Yoshlar ishlari agentligi Oliy ta’lim, fan va innovatsiyalar vazirligi hamda Tashqi ishlar vazirligi bilan birgalikda:

2025-yil 1-yanvarga qadar ingliz tili, keyingi yillarda boshqa xorijiy tillar va zamonaviy kasblarni o‘rgatish bo‘yicha dunyoning yetakchi markazlari, oliy ta’lim tashkilotlari bilan hamkorlikni yo‘lga qo‘yish, ularning xalqaro ta’lim standartlariga mos ta’lim dasturlarini “Ibrat farzandlari” va “Ustoz” loyihalariga tatbiq etish choralarini ko‘rsin;

2025-yil 1-dekabrga qadar nemis, fransuz, koreys, xitoy va yapon tillarini bilish darajasini baholovchi nufuzli xorijiy tashkilotlar bilan muzokaralar o‘tkazsin hamda O‘zbekistonda, birinchi navbatda, hududlarda ularning qo‘shimcha 5 ta markazi (filiali) ochilishini ta’minlash choralarini ko‘rsin.

8. Yoshlar ishlari agentligi 2024-yil yakuniga qadar ingliz, nemis, fransuz, ispan, koreys, xitoy va yapon tillarini B2 darajasida biladigan yoshlar sonini 100 ming nafarga yetkazish choralarini ko‘rsin.

Maktabgacha va maktab ta’limi vazirligi, Oliy ta’lim, fan va innovatsiyalar vazirligi hamda Yoshlar ishlar agentligi 2024/2025 o‘quv yilidan boshlab ta’lim muassasalarining chet tili fani bo‘yicha darslarida videomahsulotlardan, shu jumladan “Ibrat farzandlari” platformasidan keng foydalanishni yo‘lga qo‘ysin.

9. Yoshlar ishlari agentligining:

vazirlik va idoralar hamda davlat ishtirokidagi korxonalarda yosh, tashabbuskor xodimni yoshlar bilan ishlash uchun mas’ul etib belgilash;

yoshlar bilan ishlash uchun mas’ul xodimlar faoliyatini Yoshlar ishlari agentligi tomonidan uslubiy va amaliy jihatdan muvofiqlashtirish to‘g‘risidagi takliflari ma’qullansin.

10. Qoraqalpog‘iston Respublikasi Vazirlar Kengashi Raisi, viloyatlar va Toshkent shahri, shuningdek, tuman (shahar) hokimlari Kambag‘allikni qisqartirish va bandlik vazirligi bilan birgalikda xorijdagi ko‘makka muhtoj bo‘lgan yoshlar muammolarini hal etish, ularni Vatanga qaytarish, ijtimoiy qo‘llab-quvvatlash, shu jumladan kasb-hunar va xorijiy tillarga o‘qitish hamda bandligini ta’minlash choralarini ko‘rsin.

11. Yoshlar ishlari agentligi O‘zbekiston Yozuvchilar uyushmasi bilan birgalikda bolalarni Vatanga sadoqat, milliy va umuminsoniy qadriyatlar, ota-ona, oila va kattalarga hurmat ruhida tarbiyalash, ularda tabiatni asrab-avaylash tuyg‘ularini shakllantirishga qaratilgan asarlarni yaratish, ularni chop etish va ommalashtirish choralarini ko‘rsin.

12. Yoshlar ishlari agentligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

13. Mazkur qarorning ijrosini samarali tashkil qilishga mas’ul va shaxsiy javobgar etib Yoshlar ishlari agentligi direktori A.Z. Sa’dullayev, maktabgacha va maktab ta’limi vaziri X.U. Umarova hamda oliy ta’lim, fan va innovatsiyalar vaziri K.A. Sharipov belgilansin.

Qaror ijrosini muhokama qilib borish, mas’ul tashkilotlar faoliyatini muvofiqlashtirish va nazorat qilish O‘zbekiston Respublikasi Bosh vaziri A.N. Aripov zimmasiga yuklansin.

O‘zbekiston Respublikasi Prezidenti Sh. MIRZIYOYEV

Toshkent sh.,

2024-yil 27-iyun,

PQ-239-son

(Qonunchilik ma’lumotlari milliy bazasi, 28.06.2024-y., 07/24/239/0453-son)