O‘zbekiston tumanida ish boshlagan “IT-shaharcha” yoshlarning taraqqiyot drayveriga aylanadi
2026-02-05 16:00:00 / Янгиликлар
Bugun Yaypan shahrida tashkil etilgan “IT-shaharcha” faoliyati tantanali ravishda ish boshladi.
Zamonaviy infratuzilmaga ega, axborot texnologiyalari sohasida mutaxassislar tayyorlashga ixtisoslashgan yangi markaz Davlatimiz rahbarining “Hududlarda yoshlarga raqamli texnologiyalar va xorijiy tillarni o‘rganish uchun qo‘shimcha sharoitlar yaratishga qaratilgan “IT-shaharcha”lar faoliyatini tashkil etish to‘g‘risida”gi qarori ijrosi doirasida tashkil etildi.
Ochilish marosimida tuman hokimi Ravshanbek Begmatov, davlat va jamoat tashkilotlari, yoshlar hamda keng jamoatchilik vakillari ishtirok etdi.
Tadbirda tuman rahbari ushbu loyiha mamlakatimizda raqamli texnologiyalarni rivojlantirish, bu sohada yoshlarni va loyihalarni qo‘llab-quvvatlash borasidagi islohotlar izchilligining yorqin namunasi bo‘lganligi to‘g‘risida so‘z yuritdi. Mazkur maskan yoshlarning chinakam taraqqiyot drayveriga aylanishiga umid bildirildi.
Ramziy lenta qirqilib, ishtirokchilar "IT-shaharcha"da yaratilgan sharoitlar bilan tanishdilar. Soha mutaxassislari markaz va uning faoliyati to‘g‘risida taqdimot qildilar.
“IT-shaharcha” bir vaqtning o‘zida 50 nafar o‘g‘il-qizni qamrab olish imkoniyatiga ega hamda zamonaviy kompyuter texnikalari bilan jihozlangan.
Qayd etilishicha, bu yerda yoshlar bepul kovorking: yuqori tezlikdagi internet va qulay ish maydonidan foydalanib, dasturlash, 3D modellashtirish, robototexnika, raqamli marketing, mobilografiya va videomontaj kurslarida bilim olishlari mumkin. O‘quv dasturlari tajribali ustozlar tomonidan xalqaro standartlar asosida o‘tiladi. Kurslarni muvaffiqiyatli bitirgan yoshlar maxsus sertifikatlar va hamkor IT-kompaniyalardan ish takliflariga ega bo‘lishadi.
Ma’lum qilinishicha, mazkur markazda onlayn va offlayn dasrlar orqali har yili 6 ming nafarga yaqin o‘g‘il-qiz IT sohasida zamonaviy bilim va amaliy ko‘nikmalarga ega bo‘lishi rejalashtirilgan.