“Жойларда оила ва аёллар манфаати билан боғлиқ муаммоларни аниқлаш ҳамда унга тезкор оқилона ечим топиш - устувор вазифамиз”
2025-07-21 12:25:00 / Янгиликлар
Бош вазир ўринбосари – Оила ва хотин-қизлар қўмитаси раиси З.Махкамова томонидан ўтган ҳафтада амалга оширилган ишлар ҳамда жорий ҳафтада режалаштирилган ишлар таҳлил қилинди. Таъкидланганидек, ўтган ҳафтада Қўмита тизимида қатор муҳим тадбирлар ташкил этилди, соҳага оид долзарб масалалар юзасидан муҳокама йиғилишлари ўтказилди.
Шу билан бирга ҳафта давомида хотин-қизлар ҳаётини янада яхшилашга оид муҳим қарорлар, ҳужжатлар қабул қилинди.
Жумладан, “Давлат олий таълим ташкилотларига ўқишга қабул қилишнинг давлат буюртмаси параметрларини тасдиқлаш тўғрисида”ги Президент фармойиши (ПФ–43-сон, 18.07.2025 й.) қабул қилинди.
Фармойиш билан 2025/2026 ўқув йили ва келгуси 3 ўқув йили учун давлат олий таълим ташкилотларига давлат буюртмаси асосида ўқишга қабул қилиш давлат буюртмаси параметрлари тасдиқланди.
Шу билан бирга мазкур Фармойиш билан олий таълим муассасаларига кириш учун хотин-қизларга давлат гранти асосида ажратиладиган квотанинг 4000 тага оширилгани мамлакатимизда хотин-қизлар таълимига берилаётган эътибор ва ғамхўрликнинг яна бир ёрқин намунаси бўлди.
Фармойиш талабларидан келиб чиқиб, масъулларнинг вазифалари уқтирилди.
2025 йил 14 июль куни Вазирлар Маҳкамасининг “Болаларга нисбатан зўравонлик ҳолатларини аниқлаш, зўравонлик хавфи даражасини бағолаш, ҳимоя қилиш режасини ишлаб чиқиш ҳамда уни амалга ошириш тартиби тўғрисидаги Низомни тасдиқлаш ҳақида” 440-сон қарори қабул қилинди.
Қарор билан Болаларга нисбатан зўравонлик ҳолатларини аниқлаш, зўравонлик хавфи даражасини бағолаш, ҳимоя қилиш режасини ишлаб чиқиш ҳамда уни амалга ошириш тартиби тўғрисида Низом тасдиқланди. Унда:
болаларга нисбатан зўравонлик ҳолларини аниқлаш, зўравонлик хавфи даражасини баҳолаш, улар ҳақида хабардор қилиш тартиби;
болаларни ҳимоя қилиш режасини ишлаб чиқиш ва амалга ошириш тартиби;
болаларга нисбатан зўравонлик содир этган шахсларга нисбатан қўлланиладиган таъсир чоралари назарда тутилган.
Маълумки, 2024 йил 14 ноябрдаги “Болаларни зўравонликнинг барча шаклларидан ҳимоя қилиш тўғрисида” Ўзбекистон Республикаси Қонуни (ЎРҚ-996-сон)нинг
15-моддасида Оила ва хотин-қизлар қўмитасининг болаларни зўравонликнинг барча шаклларидан ҳимоя қилиш соҳасидаги ваколатлари белгиланган.
Амалдаги қонун ва қабул қилинган Ҳукумат қарори талабларидан келиб чиққан ҳолда масъуллар олдидаги вазифалар уқтирилди.
Вазирлар Маҳкамасининг “Хотин-қизларни тазйиқ ва зўравонликдан ҳимоя қилиш тизими янада такомиллаштирилиши муносабати билан Ўзбекистон Республикаси Вазирлар Маҳкамасининг “Хотин-қизларни тазйиқ ва зўравонликдан ҳимоя қилиш тизимини такомиллаштириш чора-тадбарилар тўғрисида” 2020 йил
4-январдаги 3-сон қарорига ўзгартириш ва қўшимчалар киритиш ҳақида” 2025 йил 15 июлда 441-сон қарори тасдиқланди.
Қарор билан Ҳукуматнинг “Хотин-қизларни тазйиқ ва зўравонликдан ҳимоя қилиш тизимини такомиллаштириш чора-тадбирлари тўғрисида” 2020 йил 4 январдаги 3-сон қарорига қуйидагиларни назарда тутувчи ўзгартириш ва қўшимчалар киритилди. Жумладан:
тазйиқ ва зўравонлик содир этган ёки содир этишга мойил бўлган шахснинг зўравонлик хулқ-атворини ўзгартириш бўйича тузатиш дастурини “Инсон” ижтимоий хизматлар марказлари билан келишиш тартиби;
тазйиқ ва зўравонлик содир этган шахслар томонидан келгусида шу турдаги ҳуқуқбузарликлар содир этилишининг олдини олиш бўйича уларни тузатиш дастуридан ўтказиш;
тузатиш дастуридан ўтказишда туман (шаҳар) ҳокими ўринбосарлари – Оила ва хотин-қизлар бўлимлари бошлиқлари ваколатларини кенгайтириш;
тазйиқ ва зўравонлик содир этган шахсларни тузатиш дастуридан ўтказиш жараёнига психологларни жалб қилиш ва уларнинг вазифаларини белгилаш;
хотин-қизлар масалалари бўйича инспекторларнинг ҳимоя ордерини бериш бўйича ваколатини белгилаш.
Қарор билан тузатиш дастуридан ўтказишда туман (шаҳар) ҳокими ўринбосарлари – Оила ва хотин-қизлар бўлимлари бошлиқлари ваколатлари кенгайди.
Ушбу борада ҳам масъулларнинг вазифаси уқтирилди.
Зеро, Бош вазир ўринбосари томонидан таъкидланганидек, “Жойларда оила ва аёллар манфаати билан боғлиқ муаммоларни аниқлаш ҳамда унга тезкор оқилона ечим топиш - устувор вазифамиз”.
Йиғилишда Комплаенс назорати бўйича бош мутахассис Дўстмуҳаммад Тиллаевнинг Қўмита тизимида Коррупцияга қарши курашиш фаолиятини самарали ташкил этиш борасида амалга ошириладиган ишлар тақдимоти эшитилади.