Сирдарё тумани “Ёшлик” маҳалласида “Лейла-спорт” аёллар соғломлаштириш маркази ўз фаолиятини бошлади.
2025-07-19 12:30:00 / Янгиликлар
Маросимда Бош вазир ўринбосари - Оила ва хотин-қизлар қўмитаси раиси Зулайҳo Махкамова иштирок этди. У аёллар соғломлаштириш марказининг очилиши хотин-қизларнинг соғлом ҳаёт тарзини шакллантиришга қаратилган кенг кўламли ишлар йўлида муҳим қадам эканлигини таъкидлади.
Шунингдек, “Лейла-спорт” маркази фаолияти аёллар ўртасида спортни кенг тарғиб қилиш, уларнинг жисмоний фаоллигини ошириш ва ижтимоий фаолликларини кучайтиришда самарали майдонча бўлиб хизмат қилиши ҳақида сўзлади. Маросим давомида у маҳалла аҳли ва аёллар билан мулоқот олиб бориб, спорт орқали соғлом ҳаётни оммалаштириш борасида фикр алмашди ҳамда қўллаб-қувватлашни давом эттиришга тайёрлигини билдирди.
Ушбу марказда аёлларга мўлжалланган турли спорт машғулотлари, соғломлаштириш тренинглари ва руҳий ривожланишга қаратилган дастурлар ташкил этилиши режалаштирилган бўлиб, бу ҳудуддаги аёллар учун янги имкониятлар эшигини очади.