“Қишлоқ аёлларининг иқтисодий имкониятларини кенгайтириш” мавзусида бўлиб ўтган халқаро конференцияда Бош вазир ўринбосари – Оила ва хотин-қизлар қўмитаси раиси Зулайҳо Маҳкамова маъруза қилди.
2025-04-10 17:35:00 / Янгиликлар
Жаҳон Банки таҳлилларига кўра, Ўзбекистон охирги йилларда гендер тенглигига эришиш ислоҳотлари билан катта муваффақиятга эришган дунёнинг беш мамлакати қаторидан ўрин олди.
“Бир миллион дастурчи” лойиҳаси амалиётга жорий этилиб, ахборот технологиялари соҳасида хотин-қизларнинг иштироки йилдан-йилга ортиб бормоқда.
Хотин-қизларнинг иқтисодий сектордаги улушини ошириш бўйича йирик, стратегик лойиҳалар амалга оширилмоқда.
Хотин-қизларни даромад топишга ўргатиш, тадбиркорлигини йўлга қўйиш, бизнесини ривожлантиришга оид Ўзбекистон Республикаси Президенти, Ҳукумат қарорлари қабул қилинди.
Солиқ, божхона соҳасида имтиёзлар йирик корхоналар эгалари бўлган тадбиркор хотин-қизлар бизнесларини кенгайтириш учун имкониятлар яратди.
Бу борада бизнесни ривожлантириш банки ташкил этилиши, тадбиркор аёлларнинг бизнесини қўллаб-қувватлашда илмий асос ва имтиёзли молиялаштириш имкониятларини яратди.
Тадбиркорлик, даромад топишга қаратилган муайян меҳнат фаолияти билан шуғулланиш ва фаолият турини кенгайтириш истагини билдирган хотин-қизларни қўллаб-қувватлаш дастури тасдиқланиб, амалга оширилмоқда.
Тижорат банклари томонидан аёлларни қўллаб-қувватлаш мақсадида 250 дан ортиқ лойиҳалар жорий этилди ва оилалар иқтисодиётини барқарорлаштириш ва бизнесини ривожлантиришга кўмаклашилмоқда.
Оила ва хотин-қизлар қўмитасининг тавсиялари асосида хотин-қизларга имтиёзли кредит ва субсидияларнинг ажратилиши натижасида тадбиркорларнинг 40 фоизидан ортиғини хотин-қизлар ташкил этмоқда.
Хотин-қизларнинг касб-ҳунар ва тадбиркорлик ўқитиш давлат томонидан молиялаштирилмоқда.
Ҳар йили 300 мингга яқин хотин-қизлар меҳнат бозорида талаб юқори бўлган касб-ҳунарга ва тадбиркорликка ўқитилмоқда.
«HAMROH» тадбиркор аёлларни қўллаб-қувватлаш дастури жорий этилди.
Унга кўра, хотин-қизларга «яшил лойиҳалар» ва IT соҳасидаги лойиҳаларни амалга ошириш йўлга қўйилади ҳамда ижобий кредит тарихига эга бўлган хотин-қизларга 100 млн сўмгача гаровсиз кредит ажратилади.
Хотин-қизларни тадбиркорлик фаолиятига жалб қилиш ва қўллаб-қувватлаш мақсадида «Бизнесга илк қадам», «Бизнесни йўлга қўйиш», «Бизнесни кенгайтириш», «Бизнесни юксалтириш» йўналишларида аёллар тадбиркорлигини ривожлантиришнинг яхлит тизими жорий этилмоқда.