МК 100-моддасига асосан ходимлар алоҳида асослар бўйича, жумладан, қисқартириш муносабати билан ишдан бўшатилса, ишдан бўшатилганидан кейинги 2 ой учун, агар меҳнат органидан маълумот тақдим этилса, 3-ой учун ҳам ўртача иш ҳақи тўланиши керак. Бу тўловлар МК 100-моддасида кафолатли тўловлар сифатида қайд этилган. Ваҳоланки, Меҳнат кодексининг 440-моддасида “меҳнат шартномасини алоҳида асосларга кўра бекор қилиш чоғида ходимларнинг ишга жойлашиш даври учун ўртача иш ҳақи фақат асосий иш жойидаги меҳнат шартномаси бекор қилинганда сақланади” дейилган. Бу қоидага кўра, ходим ўриндошлик жойидан қисқартириш деб ишдан бўшатилса, унга МК 100-моддасида кўрсатилган 3 ойлик иш қидириш даври учун ўртача иш ҳақи тўланмаслиги керак. Бундай тўловларни тўлаб қўйган иш берувчилар ҳаражатга куяди ва қонунни нотўғри қўллаш оқибатида тўлангани учун МК 269-моддасига асосан бу суммаларни ходимдан қайтариб ололмайди. Шокиржон Дадабоев, Уйчи туман адлия бўлими ЮХКМ бош юрисконсулти.