Тунда ҳам пахта терими қизғин давом этмоқда
2026-10-06 22:15:00 / Янгиликлар
Уйчи далаларида «оқ олтин»ни йиғиб олиш жараёни кундуздан тунга уланмоқда.
Уйчи тумани далаларида 2026 йил ҳосили учун етиштирилган пахтани йиғиб-териб олиш ишлари қизғин паллага кирган. Айни кунларда қулай об-ҳаво шароитларидан унумли фойдаланилиб, терим суръатини оширишга алоҳида эътибор қаратилмоқда.
Тун қоронғусида ҳам далада ҳаракат тўхтамайди. Замонавий пахта териш машиналари белгиланган майдонларда бир маромда ишлаб, ҳосилни қисқа муддатларда йиғиб олишга хизмат қилмоқда. Техникаларнинг тунги вақтда ҳам самарали ишлаши терим мавсумини жадал ўтказиш ва ҳосилни сифатли йиғиб олиш имконини бермоқда.
Даладаги жараён фақат терим машиналарининг ҳаракатидан иборат эмас. Механизаторлар учун зарур меҳнат шароитлари яратилган, терилган пахтани қабул қилиш ва ташиш, техникалар ҳаракатини мувофиқлаштириш каби ишлар ҳам узлуксиз ташкил этилмоқда.
Бугун туман ҳокими ҳудудларда бўлиб, фермер хўжаликларидаги терим жараёнларини кўздан кечирди. Дала бошида масъуллар ва фермерлар билан мулоқотлар ўтказилиб, мавсумни уюшқоқлик билан давом эттириш, техникалардан унумли фойдаланиш ва ҳосилни қисқа муддатларда, сифатли йиғиб олиш бўйича зарур кўрсатмалар берилди.
Айни пайтда Уйчи далаларида асосий мақсад битта — етиштирилган ҳосилни нест-нобуд қилмай, ўз вақтида ва сифатли йиғиб олиш. Зеро, пахта даласида ҳар бир тунги меҳнат эртанги хирмонга қўшиладиган муносиб ҳиссадир.