Наманган вилояти Уйчи тумани ҳокимлиги

Ўзбекистон Республикаси Президентининг ПҚ-465 ҳамда ПҚ-136-сонли қарорларида белгиланган вазифалар ижросини таъминлаш, органик маҳсулот етиштиришни кенгайтириш мақсадидаи амалий семинар ташкил этилди. Уйчи тумани маданият марказида ташкил қилинган семинарда Учқўрғон, Норин, Чортоқ, Уйчи, Янгиқўрғон туманларидан агрокластерлар, фермер ва деҳқон хўжаликлари, томорқа ер эгалари, фитосанитар давлат инспекторлари ҳамда бошқа мутасаддилар қатнашдилар. Мазкур қарорларга мувофиқ, сўз олган Ўсимликлар карантини ва ҳимояси агентлиги масъул мутахассис ходимлари ҳамда "АCС БИО CЕРТИФИCАТИОН ММC" экспертлари томонидан Республика бўйича органик маҳсулотлар етиштириш майдонларини 20 минг гектарга, “Глобал Г.А.П.” ва “БCИ (Беттер Cоттон)” сертификатларига эга экин майдонларини 10 минг гектарга етказиш, шунингдек, 2026-йил 1-январдан бошлаб мева-сабзавот маҳсулотлари экспорти ҳисоботини маҳсулот етиштирилган ҳудуд кесимида юритиш тизимини жорий этишнинг афзалликлар хусусида маълумот беришди. Тадбир давомида органик маҳсулот етиштиришнинг замонавий агротехнологиялари, халқаро стандартлар ва сертификатлаш талаблари, ички фитосанитария сертификатларини расмийлаштиришда ўзгарган тартиб, “Агрокўмакчи” мобил иловаси орқали электрон “Дала дафтари”ни юритиш механизмлари юзасидан батафсил маълумотлар бериб ўтилди. Шунингдек, дала четлари, каналлар, коллектор-дренаж ва суғориш тармоқлари атрофидаги ер майдонларидан самарали фойдаланиш, экспортбоп маҳсулотлар етиштириш ҳажмини ошириш ҳамда ҳудуднинг экспорт салоҳиятини мустаҳкамлаш масалаларига алоҳида эътибор қаратилди. Тадбир якунида иштирокчиларга белгиланган вазифаларни амалиётга изчил жорий этиш, замонавий ёндашувлар асосида ишлаб чиқариш самарадорлигини ошириш бўйича тегишли тавсиялар берилди.