Тошкент шаҳридаги "CАEх Uzbebekistan" мажмуасида давом этаётган “Ecо Expo Central Asia 2025” экологик технологиялар халқаро кўргазмасида Хитойнинг Шинжон Экология ва география институти ҳам ўз технологиялари билан иштирок этмоқда. Институт мазкур кўргазмада 11 та Хитой компаниялари томонидан ишлаб чиқарилган замонавий экологик технологияларни намойиш этмоқда.

Айтиш жоизки, Шинжон Экология ва география институти ҳамда Ўрмон ва яшил ҳудудларни кенгайтириш, чўлланишга қарши курашиш агентлиги ўртасидаги ҳамкорлик доирасида қатор ишлар амалга оширилмоқда. Хусусан, Ўзбекистонда шўрланишга чидамли галофит ўсимлик турлари экиладиган ер майдонларини кенгайтиришга алоҳида эътибор қаратилмоқда.

Институт билан биргаликда юртимизда иқлим ўзгаришлари оқибатларини юмшатиш мақсадида галофит боғларни ташкил этиш бўйича замонавий инновацион лойиҳа йўлга қўйилган. Бугунги кунда ушбу лойиҳа доирасида Арнасой, Муборак, Қоракўл, Кармана ҳамда Нукус туманларида галофит боғлари учун ер майдонлари ажратилган. Ҳозирда бу ҳудудларга 1,3 тонна кўчат уруғлари ўтказилган.

Хитойда ишлаб чиқарилган замонавий технологиялар мазкур галофит боғлари учун ажратилган ерларнинг унумдорлиги белгилаш, иқлимга мос кўчат турларини аниқлаш ҳамда уларнинг ўсувчанлигини ошириш га хизмат қилмоқда. Шунингдек, шўрланган чўл ва ярим чўл ҳудудларида галофит ўсимликлар экиш экологик барқарорликни таъминлаш, тупроқ эрозиясини камайтириш, шўрланиш даражасини пасайтиришга ёрдам беради.

“Эcо Expo Central Asia 2025” экологик технологиялар халқаро кўргазмасида Ўрмон ва яшил ҳудудларни кенгайтириш, чўлланишга қарши курашиш агентлиги ҳамда Шинжон Экология ва география институти ўртасида келгуси режалар ҳақида фикр алмашилди.