Ўрмон ва яшил ҳудудларни кўпайтириш, чўлланишга қарши курашиш агентлиги

Форумда Ўзбекистоннинг кўкаламзорлаштириш ва деградацияга учраган ерларни тиклаш соҳасидаги натижалари ва устувор йўналишлари тақдим этилди. Хусусан, «Яшил макон» умуммиллий лойиҳаси доирасида 1 миллиарддан ортиқ кўчат экилгани, мамлакатнинг кўкаламзорлаштириш даражаси 8 фоиздан 14 фоизгача оширилгани ва уни 2030 йилгача 30 фоизга етказиш мақсад қилингани қайд этилди.

Шунингдек, Орол денгизининг қуриб қолган тубида қарийб 2 миллион гектар майдонда ўрмонзорлар барпо этилгани, шунингдек, Жаҳон банки билан ҳамкорликда ўрмон ландшафтларини тиклаш ва экотуризм инфратузилмасини ривожлантириш лойиҳаси муваффақиятли амалга оширилаётгани таъкидланди.

Вазирлар диалоги да эса Ўзбекистон томонидан «Корея – Марказий Осиё: Яшил ҳамкорлик»ни шакллантириш ҳамда «Марказий Осиёнинг яшил қалқони» ташаббусининг амалий ижросига ўтиш таклифи илгари сурилди. Бунда Корея Республикаси, UNCCD ва Осиё ўрмон хўжалиги ҳамкорлик ташкилоти (AFoCO) иштирокида тажриба ҳудудларини, ўлчанадиган кўрсаткичларни, муддатларни ва молиялаштириш механизмларини белгилаш таклиф этилди.

Қолаверса, саксовулзорларни сақлаш ва модернизация қилиш бўйича минтақавий дастурни яратиш ташаббусига эътибор қаратилди. Мазкур дастур генетик тадқиқотлар, уруғчилик технологиялари, сунъий йўлдош мониторинги, сунъий интеллект ва саксовулзорларнинг Ягона рақамли атласини яратишни қамраб олади.

Бундан ташқари, ерларни тиклашга инвестицияларни жалб қилиш мақсадида Корея компаниялари ва молия институтлари иштирокида минтақавий углерод хабини ташкил этиш таклиф қилинди. Шу билан бирга, БМТнинг Чўлланишга қарши кураш тўғрисидаги конвенцияси (UNCCD) ва Иқлим ўзгариши бўйича доиравий конвенцияси (UNFCCC) билан ҳамкорликда чўл ва қурғоқчил ҳудудларда углерод лойиҳаларини амалга оширишнинг юқори қиймати ва мураккаблигини ҳисобга оладиган “Arid Lands Carbon Standard”ни ишлаб чиқиш ташаббуси илгари сурилди.

Тадбирда “Green University” ҳузуридаги Чўлланишга қарши курашиш ва чўл иқтисодиётини ривожлантириш илмий-тадқиқот институти минтақавий илмий-амалий платформа сифатида белгиланди. Ушбу платформа негизида кореялик ва Марказий Осиёлик олимлар иштирокида қўшма тадқиқотлар, дала синовлари ва пилот лойиҳалар амалга оширилади.