Поп Ихтисослаштирилган давлат ўрмон хўжалигида махсус-тактик машғулотлар ўтказилди
2026-07-20 16:50:00 / Янгиликлар
Наманган вилояти Фавқулодда вазиятлар бошқармаси томонидан Поп ИДЎХ билан ҳамкорликда ташкил этилган тадбирда Фавқулодда вазиятлар бошқармасидан 7 та махсус техника ва 42 нафар шахсий таркиб, ФВДҚТ хизматларидан 7 та техника ва 22 нафар ходим, ўрмон хўжалиги ишчи-ходимлари, ҳудудга яқин аҳоли орасидан тузилган 50 нафардан ортиқ маҳаллий кўнгиллилар иштирок этди.
Тадбир давомида шартли равишда юзага келадиган ёнғинларни бартараф этиш, ўрмон хўжалиги ходимларининг бирламчи ёнғин ўчириш воситаларидан фойдаланиш кўникмалари, Фавқулодда вазиятлар бўлинмаларининг тезкор ҳаракатлари, ёнғин тарқалишини чеклаш ҳамда куч ва воситаларни самарали бошқариш бўйича амалий ҳаракатлар бажарилди.
Шунингдек, қутқарув хизматлари ва ҳамкор ташкилотларнинг фавқулодда вазиятларга тайёргарлиги яна бир бор синовдан ўтказилиб, ўрмон ҳудудларида содир бўлиши мумкин бўлган ёнғинларни бартараф этиш, қутқарув ишларини олиб бориш, ишчи-хизматчиларнинг фавқулодда вазиятларда тўғри ҳаракат қилиши ҳамда ёнғин ва техника хавфсизлиги қоидаларига риоя этиш бўйича амалий тажрибалар мустаҳкамланди.