Фармонга кўра, акция ўтказиладиган кунларда давлат ташкилотлари ва идоралари ходимларига хизмат автотранспортидан фойдаланиш тақиқланади. Шу билан бирга, ушбу саналар иш кунларига тўғри келган тақдирда ҳам ҳайдовчиларнинг иш ҳақи сақлаб қолинади.
Мазкур ташаббус автотранспорт воситаларидан чиқадиган зарарли газлар миқдорини камайтириш орқали аҳоли саломатлигини муҳофаза қилиш, соғлом турмуш тарзини тарғиб этиш, атмосферага чиқарилаётган ифлослантирувчи моддалар ҳажмини қисқартириш, экологик барқарор муҳитни шакллантириш, шунингдек, жамоат транспорти ва экологик тоза транспорт воситаларидан фойдаланиш маданиятини кенг тарғиб қилишга қаратилган.
Акцияни юқори савияда ташкил этиш ва мувофиқлаштириш мақсадида Махсус комиссиянинг тегишли баёни қабул қилинган. Унга кўра, “Автомобилсиз кун” ва “Автомобилсиз ҳафта” акциялари доирасида давлат фуқаролик хизматчиларининг хизмат автотранспортидан фойдаланиши одоб-ахлоқ ва хизмат хулқи қоидаларини бузиш билан тенглаштирилади.
Белгиланган талабларга риоя қилмаслик тегишли давлат органлари ва ташкилотлари раҳбарлари томонидан давлат фуқаролик хизматчиларини интизомий жавобгарликка тортиш учун асос бўлади.
Маълумот учун, Ўзбекистон Республикаси Президентининг 2025 йил 25 ноябрдаги 229-сонли “Тошкент шаҳридаги экологик вазиятни яхшилаш бўйича кечиктириб бўлмайдиган чора-тадбирлар тўғрисида”ги Фармонига мувофиқ, Махсус комиссияга транспорт воситалари ҳаракатини чеклаш ваколати берилган. Махсус комиссия томонидан қабул қилинадиган қарор ва кўрсатмалар барча давлат органлари ва ташкилотлари, шунингдек юридик ва жисмоний шахслар учун мажбурий ҳисобланади.
“Автомобилсиз кун” акцияси доирасида вазирлик ва идоралар, маҳаллий давлат ҳокимияти органлари, таълим муассасалари ҳамда кенг жамоатчиликнинг фаол иштироки муҳим аҳамият касб этади. Бундан ташқари, ушбу кунларда аҳолининг экологик маданиятини оширишга қаратилган тарғибот тадбирлари, оммавий сайрлар ва жамоатчилик акциялари ҳам ташкил этилади.
Барча давлат ташкилотлари ходимлари ва фуқаролар ушбу ташаббусни қўллаб-қувватлашга ҳамда унда фаол иштирок этиб, атроф-муҳит тозалигини таъминлаш ва юртимизда соғлом экологик муҳитни шакллантиришга муносиб ҳисса қўшишга чақирилади.
