Тошкентда чўлланишга қарши курашиш бўйича халқаро илмий-амалий семинар ўтказилди
2026-05-23 17:22:00 / Янгиликлар
Бугун тадбир меҳмонлари Тошкент шаҳрида барпо этилаётган Миллий дендрология боғида бўлишиб, бу ерда амалга оширилаётган кўкаламзорлаштириш ва бунёдкорлик ишлари билан яқиндан танишишди. Экология ва иқлим ўзгариши миллий қўмитаси ҳузуридаги Ўрмон агентлиги директори Эркин Муҳиддинов меҳмонларга бу ерда олиб борилаётган ишлар, ҳудудда яратилаётган суғориш тизимларидан тортиб, экилаётган дарахт ва бута турлари, уларнинг парвариши жараёнлари ҳақида батафсил маълумот берди.
"Ўзбекистон Республикаси Президенти Шавкат Мирзиёевнинг бевосита ташаббуси билан мамлакатнинг барча ҳудудларида худди шундай умумий ер майдони 100 гектардан кам бўлмаган Миллий дендрология боғлари барпо этилиши мақсад қилинган, – деди Э.Муҳиддинов. – Бундан кўзланган асосий мақсад республика ҳудудларида атмосфера ҳавоси тозалигига эришиш, фавқулодда содир бўладиган чанг ва қум бўронларининг олдини олиш, экологик барқарорликни таъминлаш ва аҳоли учун соф экологик шароитлар муҳити яратишдан иборатдир. Аминмизки, яқин йилларда кўриб гувоҳи бўлаётганингиз ушбу дендрология боғи ҳам пойтахт аҳолиси ва меҳмонлар севиб дам оладиган чинакам сўлим масканга айланади."
Шунингдек, тадбир иштирокчилари Дархон илмий тажриба станциясида ҳам бўлишди. Меҳмонларга бу ерда етиштирилаётган ноёб турдаги дарахт ва бута кўчатлари, олиб борилаётган агротехник тадбирлар ва жорий этилаётган инновацион ечимлар ҳақида тўлиқ маълумот берилди.
Шундан сўнг, Марказий Осиё атроф-муҳит ва иқлим ўзгариши университетида халқаро илмий-амалий семинарнинг якуний тадбири бўлиб ўтди. Унда сўз олганлар ушбу семинар барча иштирокчилар учун соҳага оид билим ва малака ошириш, ўзаро тажриба алмашиш, ўрмонлар барпо этиш ва чўлланишга қарши курашиш бўйича илғор инновацион ечимларни ягона нуқтада бирлаштирган платформа вазифасини ўтаб берганлигини алоҳида эътироф этишди.
Якунда халқаро илмий-амалий ўқув семинари иштирокчиларига сертификатлар топширилди.