Тадбирда Ўрмон агентлиги масъуллари, туман фавқулодда вазиятлар бўлими ходимлари, Ўсимликлар карантини ва ҳимояси агентлиги мутахассислари ҳамда оммавий ахборот воситалари вакиллари иштирок этди.

Маълумки, охирги йилларда бутун дунёда иқлим ўзгаришлари натижасида қурғоқчилик даражасининг ортиб бориши туфайли ўрмонларда ёнғинлар келиб чиқиши ҳамда дарахтларнинг касаллик ва зараркунандалари хавфи янада кўпайиб  бормоқда. Шу боис, 2025 йилда ўрмон фонди ерларида фавқулодда ёнғинларнинг олдини олиш мақсадида ўрмон хўжаликларида 160 кмдан ортиқ оралиқ жойлар, ўт ўчирувчи машиналар ҳаракатланиши учун 270 кмдан зиёд махсус  йўллар, 190 кмдан зиёд ёнғинга қарши ҳимоя чизиқлари, қарийб 80 кмда зовурлар ҳамда қарийб 14 минг метр куб махсус сув ҳавзалари барпо этилди. 10 мингдан ортиқ ёнғинга қарши бирламчи ускуналар шай ҳолатга келтирилган.

Шунингдек, 2025 йилда жойларда дарахтларда касаллик ва зараркунандаларни эрта аниқлаш мақсадида 100 мингдан ортиқ гектарда ўрганиш ишлари олиб борилди. Жумладан, 80 минг гектардан зиёд ҳудудда касаллик ва зараркунандаларга қарши кимёвий усуллар билан курашиш ишлари амалга оширилган.   

2025 йилда ҳудудий давлат ўрмон хўжаликларининг моддий-техник базаси янада бойитилди. Жумладан,  ўрмон хўжаликларига янги 12 та экскаватор, 15 та трактор, 15 та культиватор, 10 та сув ташувчи автомашиналар топширилди. Шунингдек, ўрмон хўжаликлари ёнғинларни ўз вақтида бартараф этишда қўл келадиган 250 та мотопомпа, 200 та моторли сув пуркагич ҳамда 250 та механик сув пуркагич каби жиҳозлар билан таъминланган.

Тадбир давомида ўрмон ҳудудларида содир бўладиган ёнғинларни бартараф этиш, ҳудудларда мавжуд дарахт ва буталарни касаллик ва зараркунандалардан ҳимоя қилиш, тезкор ахборот алмашинуви ва бошқарувни ташкил этиш бўйича амалий кўргазмалар ўтказилди.

Таъкидлаш жоизки, бу борада амалга оширилаётган ишлар республикада иқлим ўзгаришлари оқибатларини юмшатиш, чўлланишнинг олдини олиш, дарахтларнинг касаллик ва зараркунандаларига қарши самарали курашиш ҳамда ўрмонларда ёнғинлар хавфини камайтиришга хизмат қилади.