Фарғонада эҳтиёжманд оилалар даромади янада оширилмоқда
2026-02-23 13:55:00 / Янгиликлар
Ўзбекистон Республикаси Вазирлар Маҳкамасининг 2025 йил 18 декабрдаги 798-сон қарори ижросини таъминлаш мақсадида Ўрмон агентлиги ҳузуридаги Фарғона давлат ўрмон хўжалиги томонидан ўрмон фонди ерларидан самарали фойдаланиш бўйича амалий ишлар олиб борилмоқда.
Хусусан, Ижтимоий реестрга киритилган оилалар даромадини ошириш, уларнинг бандлигини таъминлаш мақсадида хўжаликнинг Шоҳимардонобод бўлимида тут плантациялари барпо этилди. Умумий майдони 6 гектарни ташкил этадиган плантацияга тут кўчатлари ўрмон хўжалиги ишчилари томонидан экилиб, белгиланган агротехник тадбирлар амалга оширилди.
Тутзор ерлар парвариш қилиш учун эҳтиёжманд оилаларга имтиёзли шартларда бўлиб берилди. Эндиликда тут қатор ораларига даромадли қишлоқ хўжалиги экинлари экилиши режалаштирилмоқда.
Бунинг натижасида ижтимоий ҳимояга муҳтож оилалар учун қўшимча даромад олиш манбаси яратилади.