Йилнинг деярли уч юз куни қуёшли саналадиган юртимизда муқобил энергиядан фойдаланиш имконияти жуда катта. Мутахассисларнинг таъкидлашича, юртимизда йил давомидаги булутсиз кунлар 250-270 кунни, қуёшнинг нурланиш давомийлиги эса 2850-3050 соатни ташкил қилишини инобатга олсак, қайта тикланувчи қуёш энергиясидан фойдаланиш энг қулай бўлган энергия манбаси ҳисобланади.
Тараққиёт стратегиясида иқтисодиётни электр энергияси билан узлуксиз таъминлаш ҳамда “Яшил иқтисодиёт” технологияларини барча соҳаларга фаол жорий этиш, иқтисодиётнинг энергия самарадорлигини 20 фоизга ошириш бўйича вазифалар белгиланган. Бунда, 2026 йилга келиб электр энергияси ишлаб чиқариш кўрсаткичини қўшимча 30 миллиард киловатт-соатга ошириб, жами 100 миллиард киловатт-соатга етказиш кўзда тутилган.
Бу борада Учқудуқ туманида ҳам ишлар олиб борилмоқда. Жумладан, жорий йилда жами 130 та қуёш панели ўрнатилиб,  умумий қуввати 1,4 МВт.ни ташкил этади. Режага нисбатан 156,8 фоизга бажарилди. Рақамларни таҳлил қиладиган бўлсак, ижтимоий соҳа объектларида 19 та қуёш панели ўрнатилиб, умумий қуввати 0,3 МВт.ни, тадбиркорлик субъектларида 36 та қуёш панели ўрнатилиб, умумий қуввати 0,7 МВт.га,  аҳоли  хонадонларига 42 та панели ўрнатилиб, умумий қуввати 0,3 МВ.га етказилди. Белгиланган режа 310 фоизга бажарилди. Кўп қаватли уйларга эса 3 та қуёш панели ўрнатилиб, умумий қуввати 0,06 МВт.  бўлди. Режа 120 фоизга уддаланди.
- Чоколайф (лот) 7777 корхонамизга 40 кВт қувватли қуёш панелларини ўрнатганмиз. Электр энергияга бўлганойлик эҳтиёжни тўлиқ  қоплаяпмиз, ортиқча ишлаб чиқарилган электр энергияни эса давлатга сотаяпмиз, - дейди хусусий тадбиркор Ғайрат Музаффаров. 
Ҳа, қуёш панеллари ўрнатган тадбиркорлар ягона энергетика тизимига узатилган ва истеъмол қилинган электр ҳажмининг ҳисоби биллинг тизимида юритилиб, ой якуни билан  ўзаро ҳисоб-китоб қилинади.
Яна бир гап. Сиз хонадонингизга қуёш панеллари сотиб олиб, ўрнатдингизми, албатта, “Қуёшли хонадон” дастурида электрон тарзда рўйхатдан ўтинг. Бу сиз сарфлаган электр энергияси ҳисобини юритиш, харажатни қоплашдан ташқари, қўшимча даромад ҳам келтиришини унутманг!.

Райҳон ҚОДИРОВА, 
махсус мухбиримиз.