Она тилимиз — миллатимиз фахри, маънавиятимиз кўзгуси!

Жорий йилнинг 15-октябр куни Учқудуқ тумани Мактабгача ва мактаб таълими бўлимига қарашли 12-сонли умумтаълим мактабида ўзбек тилига давлат тили мақоми берилганининг 37 йиллиги муносабати билан “Асрлар оша яшаган тил” мавзусида туман семинари юқори савияда ташкил этилди.

 Мазкур семинарнинг асосий мақсади — она тилимизга бўлган ҳурмат ва эҳтиромни янада юксалтириш, ўқитувчилар ўртасида илғор педагогик тажрибаларни оммалаштириш, замонавий таълим усулларини амалиётга татбиқ этиш ҳамда ўзаро тажриба алмашишдан иборат бўлди.

 Семинар кўтаринки руҳда бошланди.

Семинарда иштирок этиш учун ташриф буюрган меҳмонлар ва устозлар мактаб жамоаси томонидан самимий кутиб олинди. Тадбир аввалида меҳмонлар учун ташкил этилган психологик тренинглар иштирокчиларда кўтаринки кайфият уйғотиб, ўзаро самимий мулоқот ва ҳамкорлик муҳитини яратди.

 Шундан сўнг мактаб директори Қ. Полатова семинарни тантанали равишда очиб берди. Ўз нутқида она тилининг миллат ҳаётидаги беқиёс ўрни, уни асраб-авайлаш, ёш авлод қалбида тилга муҳаббат ва миллий қадриятларга ҳурмат туйғуларини шакллантириш муҳимлигини таъкидлаб ўтди.

 Семинар доирасида илғор тажрибалар намойиш этилди.

Дастур асосида ташкил этилган очиқ дарслар давомида ўқитувчилар ўзларининг педагогик маҳорати, замонавий таълим технологияларидан фойдаланиш кўникмалари ҳамда самарали дарс ташкил этиш тажрибаларини намойиш этдилар. Машғулотларда ўқувчиларнинг фаоллигини ошириш, мустақил фикрлаш қобилиятини ривожлантириш, дарс жараёнида интерфаол методлардан самарали фойдаланиш масалаларига алоҳида эътибор қаратилди.

Очиқ дарслар иштирокчилар учун ўзаро тажриба алмашиш, янги ғоялар билан танишиш ва касбий маҳоратни янада ошириш имконини берди. Дарслар юзасидан билдирилган фикр-мулоҳазалар ва тавсиялар келгусидаги педагогик фаолият учун муҳим аҳамият касб этди.

 Ҳамкорлик — тараққиёт гарови!

Семинар давомида устозлар ўртасида ўзаро фикр алмашиш, самарали педагогик ёндашувларни муҳокама қилиш ва таълим сифатини оширишга қаратилган таклифлар билдирилди. Бундай тадбирлар педагогларнинг касбий ривожланишига, илғор тажрибаларни оммалаштиришга ҳамда таълим муассасалари ўртасидаги ҳамкорликни мустаҳкамлашга хизмат қилади.

 Маънавият ва маърифат уйғунлиги

Семинар якунида ўзбек тилининг бой тарихи, бетакрор жозибаси, миллий қадриятларимиз ва она тилимизга бўлган муҳаббатни тараннум этувчи маънавий-маърифий тадбир ташкил этилди. Тадбир давомида она тилимизнинг улуғворлиги, аждодлардан мерос бўлиб келаётган бебаҳо маънавий бойлигимиз эканлиги яна бир бор намоён бўлди.

 Хулоса ўрнида, Учқудуқ тумани 12-сонли умумтаълим мактабида ташкил этилган “Асрлар оша яшаган тил” мавзусидаги туман семинари мазмунли, самарали ва кўтаринки руҳда ўтди. Семинар ўз олдига қўйган мақсад — педагоглар ўртасида тажриба алмашиш, илғор таълим усулларини намойиш этиш ва ўзаро ҳамкорликни ривожлантиришга муносиб ҳисса қўшди.

Тил бор экан — миллат барҳаёт, тил бор экан — миллатнинг руҳи ва ғурури абадийдир!

🇺🇿 Она тилимизни асрайлик, қадрлайлик ва келажак авлодга соф ҳолда етказайлик!