Қизилқум бойликлари — иқтисодий салоҳият манбаи!
2026-10-15 14:05:00 / Янгиликлар
Учқудуқда каолин қазиб олиш ва қайта ишлашга ихтисослашган янги корхона янги йилнинг биринчи чорагида фойдаланишга берилади
Қизилқум бағридаги табиий бойликлар нафақат ҳудуднинг минерал-хомашё салоҳиятини намоён этади, балки янги ишлаб чиқариш қувватларини яратиш, инвестицияларни жалб қилиш ва аҳоли бандлигини таъминлаш учун ҳам кенг имкониятлар очади. Ана шундай имкониятларни иқтисодий тараққиёт омилига айлантириш йўлида Учқудуқ туманида каолин қазиб олиш ва қайта ишлашга ихтисослашган «Сифатли каолин» МЧЖ корхонаси барпо этилмоқда.
Бугунги кунда корхона ҳудудида қурилиш-монтаж ишлари жадал давом этмоқда. Ишлаб чиқариш жараёнини ташкил этишга мўлжалланган қатор объектлар янгидан қурилаётир.
Лойиҳанинг эътиборга молик жиҳатларидан бири — ишлаб чиқариш жараёнида Германия, Хитой ва Украинада ишлаб чиқарилган замонавий технологиялардан фойдаланиш кўзда тутилганидир. Бу корхонада каолин минерал хомашёсини қайта ишлаш жараёнларини замонавий ишлаб чиқариш талаблари асосида ташкил этиш имконини беради.
Корхонанинг йиллик қайта ишлаш қуввати 80 минг тонна каолин минерал рудасини ташкил этади.
Умумий қиймати 35 млн. АҚШ долларига тенг бўлган лойиҳанинг амалга оширилиши Учқудуқ тумани иқтисодий ҳаётида муҳим воқеалардан бири бўлиши кутилмоқда. Корхона қурилиши 2022 йилда бошланган бўлиб, лойиҳанинг биринчи босқичини жорий йил охирида фойдаланишга топшириш режалаштирилган.
Учқудуқ туман ҳокимининг инвестициялар бўйича ўринбосари Эркин Расуловнинг таъкидлашича, корхона тўлиқ қувват билан ишга тушгач, 150 та янги иш ўрни яратилади.
Учқудуқ туман ҳокимлиги ахборот хизмати.