Навоий вилояти Учқудуқ тумани ҳокимлиги

Мамлакатимизда ёшлар ўртасида спортни оммалаштириш, уларнинг иқтидорини юзага чиқариш ва соғлом турмуш тарзини қарор топтиришга қаратилган ишлар изчил давом эттирилмоқда. Жумладан Учқудуқ туманида ҳам “Янги Ўзбекистон Олимпия чўққилари” мусобақалари доирасида ўтказилган “Учқудуқ туман ҳокими Олимпиадаси”нинг якуний босқичи ҳамда тантанали тақдирлаш маросими бўлиб ўтди. Тантанали маросимда туман ҳокими Учқун Елмуратов иштирок этиб, мусобақаларда фаол қатнашган ёш спортчиларни муносиб тақдирлади. Ўз сўзида у ёшларнинг спортга бўлган қизиқиши тобора ортиб бораётганини алоҳида таъкидлаб, уларнинг келгусида юксак марраларни забт этишига ишонч билдирди. Мусобақаларда жами 688 нафар спортчи иштирок этган. Уларнинг 500 нафари ғолиб ва совриндор сифатида эътироф этилди. Ғолиб ва совриндор спортчилар ҳамда уларнинг мураббийларига туман ҳокимининг диплом ва эсдалик совғалари топширилди. Натижаларга кўра, 168 нафар иштирокчи 1-ўринни, 166 нафар 2-ўринни ва яна 166 нафари 3-ўринни қўлга киритди. Умумжамоа ҳисобида эса туман спорт мактаби жамоаси биринчи ўринни эгаллаб, мутлақ ғолибликни қўлга киритди. Иккинчи ўрин 20-мактаб жамоасига, учинчи ўрин эса 3-мактаб жамоаларига насиб этди. Айниқса, 1-ўринни қўлга киритган спортчилар учун бу мусобақа катта имконият эшикларини очди. Улар вилоят босқичида иштирок этиш йўлланмасини қўлга киритиб, эндиликда туман шарафини ҳимоя қилишдек масъулиятли вазифани зиммаларига олдилар. 13 та спорт туридан ташкил этилган “Учқудуқ туман ҳокими Олимпиадаси” мусобақалари ёшлар учун ўз имкониятларини чамалаш ва синовдан ўтказиш имконини берганлиги билан ҳам аҳамиятли бўлди. УЧҚУДУҚ ТУМАН ҲОКИМЛИГИ АХБОРОТ ХИЗМАТИ.