Ассалому алайкум азиз тумандошлар!

Ҳурматли ижтимоий тармоқ кузатувчилари!

   Мамлакатимизда инсон қадрини улуғлашга қаратилган изчил сиёсат натижасида  аҳоли фаровонлигини ошириш ҳамда камбағалликни қисқартиришга алоҳида эътибор қаратилмоқда. Меҳнат бозорини ислоҳ қилиш, тадбиркорликни ривожлантириш орқали аҳоли бандлигини таъминлаш, оилалар  турмуш шароитини яхшилаш борасида салмоқли ишлар амалга оширилмоқда.

    Бу борада ҳурматли Президентимизнинг 2024 йил 23 сентябрдаги “Камбағалликни қисқартириш ва аҳоли турмуш фаровонлигини ошириш борасидаги чора-тадбирларни янги босқичга олиб чиқиш тўғрисида”ги фармони дастуриламал бўлиб хизмат қилмоқда.

    Мазкур фармоннинг ижроси  юзасидан  Учқудуқ туманида амалга оширилаётган ишлар хусусида тўхталиб ўтадиган бўлсак,  бугун туманимизда  39 минг нафардан ортиқ аҳоли истиқомат қилади. Уларнинг 33 минг нафари меҳнат ресурсларини, 28 минг нафари иқтисодий фаол аҳолини, 27 минг  нафарини эса даромадли  банд  фуқароларни ташкил этади.

   Учқудуқ тумани вилоятнинг бугунги нуфузи, иқтисодий жиҳатдан ривожланиши, саноат ва халқ хўжалигида эришилаётган ютуқларда ўзининг салмоқли ҳиссасига ва муҳим ўрнига эга эканлиги ушбу рақамлардан  ҳам кўриниб турибди.

    Йил бошида 270 та оила камбағаллик реестрида қайд этилган эди. Амалга оширилган манзилли чора-тадбирлар, маҳалла ва олис овулларда олиб борилаётган “Камбағалликдан фаровонлик сари” тамойили асосидаги фаолият натижасида  151 та оила реестрдан чиқарилган. 119 та оила билан ишлар давом эттирилмоқда.

    Амалга оширилган бу каби  саъй-ҳаракатларнинг замирида аввало  туман ҳокимлиги, тегишли корхона-ташкилотлар,  ҳудуд тараққиётига дахлдорлик ҳисси билан ёндашадиган тадбиркорлар, қолаверса ўз турмуш тарзини ўзгартиришга қарор қилган фуқароларимизнинг ҳамжиҳатликдаги меҳнатининг самараси бор, дейиш мумкин.

    Юқорида таъкидланган камбағаллик реестридаги 119 та оиланинг 99 таси сариқ тоифа, 20 таси қизил тоифадаги оилалар ҳисобига тўғри келади. Йил якунига қадар ушбу оилалар вакилларининг бандлигини таъминлаш, касб-ҳунар эгаллашларига кўмаклашиш,  ўз-ўзини банд қилиш орқали доимий даромадга эга бўлишларида амалий кўмак кўрсатишни мақсад қилганмиз.

    “Камбағалликдан фаровонлик сари” дастурига асосан Навоий кон металлургия комбинати Учқудуқ  туманига бириктирилган бўлиб, оғир тоифадаги “Йўлчилар” ва “Узунқудуқ” овул фуқаролар йиғини  танлаб олинган.

    Ушбу ҳудуддаги 56 та кам таъминланган  оилага 280 бош майда шохли мол берилган. “Йўлчилар” овулидаги 5 та оиланинг яшаб турган уй-жойларида  қурилиш ва капитал  таъмирлаш ишлари олиб борилди. 

Янгича қиёфа касб этган, яшаш учун барча шарт-шароитлар яратилган уй-жойларга кўчиб ўтган хонадон эгаларининг  мамнунлигини  кузатиш  мумкин. Зотан, Давлатимиз раҳбари таъкидлаганидек, “Инсон эртага эмас, узоқ келажакда эмас, айнан бугун ўз ҳаётидан рози ва мамнун бўлиб яшаши керак”.

   Қадрли тумандошлар!

2025 йилнинг  1 январб ҳолатига кўра, Учқудуқ туманида 1069 нафар ишсиз қайд этилган бўлиб, ишсизлик даражаси 4,7 фоизни ташкил этган эди. Ҳудуддаги корхона-ташкилотлар ҳамда тадбиркорлик субъектлари томонидан янги иш ўринларининг яратилиши натижасида ишсизлар сони 1 ноябрь ҳолатида  680 нафарга камайди. Ишсизлик даражаси эса 3,3 фоизни ташкил этмоқда.

Ҳозирда  йирик маҳаллий ва хорижий қўшма корхоналар ҳамда ташкилотларда 50 дан ортиқ бўш иш ўрни борлигини маълум қиламан. Мазкур бўш иш ўринларига меҳнат қилиш истагида бўлган туманимиз фуқароларини Учқудуқ туман ҳокимлигига мурожаат қилишларини сўрайман.

Уларнинг меҳнат бозорига кириб келишлари, мутахассислиги  ва  малакасига мос бўлган иш ўринларига жойлашишлари учун амалий кўмак беришга ҳар доим тайёрмиз.

Шунингдек, ижтимоий-тиббий кўмакка муҳтож оилаларни ҳар томонлама қўллаб-қувватлаш,  меҳнат бозорида  талаб юқори бўлган касбларга қайта тайёрлаш, тадбиркорлик ташаббусларини рағбатлантириш орқали ҳар бир хонадонда ҳар бир оилада  ижобий ўзгаришларни амалга оширишни мақсад қилганмиз.

Ҳурматли тумандошлар!

Бугунги кунда  ишсизликни камайтириш орқали камбағалликни қисқартириш энг устувор масала сифатида қаралмоқда-ки,  ҳар бир иш ўрни – бу янги имконият, ҳар бир банд фуқаро – бу фаровон оила демакдир!.

Куни-кеча  Учқудуқ туманидаги аҳолининг ижтимоий эҳтиёжманд тоифалари-ни 2026 йилда ишга жойлаштириш учун иш ўринларининг энг кам сонини белгилаш ва захирага қўйиш тўғрисидаги қарор имзоланди. Ушбу қарор асосида 276 та иш ўринлари захираси яратилди.

Давлатимиз раҳбарининг  топшириғига мувофиқ, ҳар куни соат 9:00 да Учқудуқ туман Халқ қабулхонасида фуқаролар қабули ташкил этилмоқда.  Ҳар ҳафта пайшанба куни эса шaxсан менинг раҳбарлигимда очиқ қабуллар ўтказилмоқда.

“Иш беринг” телеграм канали орқали мурожаат қилган ҳар бир фуқаро мен бошчилигимда қабул қилинмоқда. Уларнинг муаммолари атрофлича ўрганилиб, ижобий ҳал этиш чоралари кўрилмоқда.

Зеро, ҳар бир мурожаат – биз учун масъулият, ҳар бир ечим –аҳолининг давлат идораларига бўлган  ишончини англатади!.

Қадрли учқудуқликлар!.

Учқудуқ тумани  ривожланган саноати, қишлоқ хўжалиги маҳсулотлари ҳамда турли йўналишларда фаолият олиб бораётган тадбиркорлиги билан кўпчиликка ибрат - намуна бўлиб келмоқда.  Ҳудуддаги жадал ўзгаришларни кузата туриб, Учқудуқ – бой имкониятлар замини, дейиш мумкин!.

Бизда аҳолини иш билан таъминлаш, тадбиркорликка кенг жалб этиш, ёшларнинг ташаббусларини қўллаб-қувватлаш учун етарли иқтисодий салоҳият ва ижтимоий имкониятлар мавжуд.

Мен  бугун Учқудуқ тумани раҳбари сифатида Сиз учқудуқликларга мурожаат қилиб, яратиб берилаётган имкониятлардан унумли фойдаланишга, ўз ҳаётингиз қолаверса, фарзандларингиз келажаги учун масъулиятни ҳис этиб, барча жабҳада фаол бўлишга чақираман!.

Келинглар азиз учқудуқликлар, обод ва кўркам, яшаш учун ҳар томонлама қулай шаҳар - Учқудуқни биргаликда барпо этайлик!. Элу-юртга даҳлдорлик  ҳар биримизнинг инсонийлик бурчимизга айланиши лозим!

Ишончим комилки, ҳамжиҳатлик, меҳнатсеварлик ва фидойилик билан биз туманимизни янада обод, аҳолимизни фаровон, ёшларимизни эса янада бахтли ҳаётга бошлаймиз!.