Тўрақўрғон тумани ҳокими Шерали Қосимов жорий йилда «оғир» маҳалла дея баҳоланган Узумзор ҳамда Қодиробод маҳалласи аҳли билан учрашди
2026-02-10 11:00:00 / Янгиликлар
Юзма-юз мулоқот давомида ҳудуддаги муаммолар ўртага ташланди. Хусусан, экинларни суғориш, электр таъминоти ҳамда фойдаланилмаётган экин майдонларидан даромад кўриш борасида фикр-мулоҳазалар, таклифлар билдирилди.
Туман раҳбари мутасаддиларга топшириқлар берар экан, ҳудуддаги ҳар бир ижтимоий-иқтисодий масала алоҳида назоратда эканлигига урғу берди.
Шунингдек, мазкур маҳаллаларда азалдан узумчилик ривожлангани, фақат бугун ана шу анъанани давом эттирган ҳолда экспортбоп узум навларидан кўпайтириш кераклиги айтилди.
Янги навли кўчатларни сотиб олиш учун давлат томонидан субсидиялар ажратилаётганлиги ва бундан унумли фойдаланиш зарурлиги таъкидланди.
23-мактабда ташкилланган учрашувда Ш. Қосимов, шунингдек, юқори синф ўқувчилари билан ҳам суҳбатлашди. Яратилган қулай шароитларга мос равишда пухта билим олиб, юқори малакали мутахассис бўлиш зарурлигига эътибор қаратилди.
Тўрақўрғон тумани ҳокимлиги
Ахборот хизмати