Тошкент вилояти ҳокимлиги

М У Р О Ж А А Т И
Ассалому алайкум, ҳурматли Тошкент вилояти аҳолиси!
Мамлакатимизда тинчлик ва осойишталикни таъминлаш,жамоат хавфсизлигини мустаҳкамлаш борасида мутлақо янгича ёндашувлар, замонавий ва самарали механизмлар ҳаётга изчил татбиқ этилмоқда.
Бу борада амалга оширилаётган ислоҳотлар нафақат ҳуқуқни муҳофаза қилувчи органлари фаолиятини такомиллаштиришга, балки энг қуйи бўғин – маҳалла даражасида хавфсиз ва барқарор муҳитни шакллантиришга қаратилгани билан ҳам алоҳида аҳамият касб этмоқда.
Ҳуқуқни муҳофаза қилувчи органлар ҳамда мутасадди идора ва ташкилотлар билан ҳамкорликда амалга оширилган профилактик тадбирлар натижасида вилоятимизда 2026 йилнинг 7 ойи давомида олдини олиш мумкин бўлган жиноятлар сезиларли даражада камайди.
Шунингдек, вилоятдаги 886 та маҳалланинг 315 тасида, яъни 35 фоизида жиноят содир этилмади.
Ижтимоий профилактика тизимининг самарадорлиги ва таъсирчанлигини ошириш юзасидан амалга оширилган чора-тадбирлар доирасида ҳуқуқбузарлик содир этиш ёки ҳуқуқбузарликдан жабрланиш эҳтимоли юқори бўлган шахслар учун 113.272 та хулосалар расмийлаштирилиб, шундан 91.366 та маиший ва ижтимоий соҳадаги муаммоларнинг ҳал этилиши таъминланди.
Жиноят содир этиш хавфи юқори бўлган ишсизлар, судланганлар, пробация ва маъмурий назоратдаги шахслар, алимент тўловчи ишсизлар, меҳнат миграциясидан қайтганлар, назоратсиз ёшлар ҳамда оғир ижтимоий аҳволдаги оилалар алоҳида хатловдан ўтказилиб, улар билан “битта шахс – битта муаммо – битта масъул – битта ечим” тамойили асосида ишлаш тизими жорий этилди.
Криминоген вазияти оғир бўлган маҳаллаларда 1 841 нафар аҳолининг бандлиги таъминланди.
Муқаддам судланган ва маъмурий назоратда турувчи 2 917 нафар шахслар билан индивидуал суҳбат ўтказилди.
Бугунги кунда аҳолининг тинч ва фаровон ҳаёт кечириши учун зарур шарт-шароитлар яратилаётганлигига қарамай, айрим шахслар томонидан фуқароларнинг ҳаёти, соғлиғи ва мол-мулкига қарши жиноятлар содир этилаётгани ташвишли ҳолатдир.
Хусусан, жорий йилнинг ўтган даврида вилоятимизда қасддан одам ўлдириш, қасддан баданга турли даражада шикаст етказиш ҳамда босқинчилик жиноятлари содир этилди.
Таҳлиллар мазкур жиноятларнинг аксарияти ёшларнинг назоратсиз қолиши ҳамда оилавий муносабатлардаги келишмовчиликлар оқибатида содир этилаётганини кўрсатмоқда.
Бу эса оилаларда соғлом муҳитни қарор топтириш, миллий оилавий қадриятларни мустаҳкамлашга қаратилган профилактик чора-тадбирларни янада кучайтиришни талаб этади.
Ҳар бир оилада соғлом маънавий муҳитни қарор топтириш, ёш авлодни Ватанга садоқат, қонунга ҳурмат, юксак маънавият ва миллий қадриятларга эҳтиром руҳида тарбиялаш, маҳаллаларда ўзаро ҳамжиҳатлик, аҳиллик ва қўшничилик муносабатларини янада мустаҳкамлаш – жамиятимизда тинчлик ва осойишталикни таъминлашнинг муҳим омилидир.
Зеро, оила ва маҳалладаги соғлом муҳит, ўзаро ҳурмат ва дахлдорлик ҳиссини кучайтириш орқали ҳуқуқбузарлик ва жиноятларнинг барвақт олдини олиш, ёшларни турли салбий таъсирлардан асраш ҳамда жамиятда қонунга итоаткорлик муҳитини мустаҳкамлашга эришилади.
Шуни ҳам таъкидлаш лозимки, бугунги кунда ахборот технологиялари ҳаётимизнинг барча жабҳаларига тезкорлик билан кириб келаётган бир вақтда айрим ғараз ниятли шахслар бундан жиноий мақсадларда фойдаланмоқда.
Сўнгги вақтларда фуқароларнинг ишончига кириш ва уларга зарарли иловаларни ижтимоий тармоқлар ёрдамида юбориш орқали пул маблағларини фирибгарлик ва ўғирлик йўли билан ўзлаштириш ҳолатлари ҳам кўпаймоқда.
Кибержиноятчилар асосан фуқароларнинг соддалиги ва рақамли саводхонлиги етарли эмаслигидан фойдаланмоқда.
Эътибор беринг 4 293 та кибержиноятлар содир этилиб, салмоғи ўтган йилларга нисбатан сезиларли даражада ошиб бормоқда.
Интернет тармоғидаги турли ҳил алдовларга, осон бойлик орттирувчи чақирувларга ишониб, фирибгарларнинг тузоғига тушиб қолмаслик чораларини кўриш, бундай ҳолатларга дуч келсангиз сизга хизмат кўрсатувчи банк муассасаси ёки ҳудудий ички ишлар органларига мурожаат қилишингиз лозим.
Азиз юртдошлар !
Вилоятимизда криминоген вазиятни янада барқарорлаштириш, жиноятчиликни жиловлаш ва ҳуқуқбузарликларнинг барвақт олдини олиш борасида олдимизда турган муҳим вазифаларни барчамиз яхши англаймиз.
Шу мақсадда жиноятларни келтириб чиқараётган сабаблар ҳамда уларнинг содир этилишига имкон бераётган шарт-шароитларни ўз вақтида аниқлаш ва бартараф этиш, қонун бузилиши ҳолатларига йўл қўйган масъул шахсларга нисбатан қонуний чоралар кўриш, шунингдек, ҳудудларда барқарор криминоген вазиятни таъминлашга қаратилган ишлар изчил давом эттирилмоқда.
Бу борада маҳаллаларда хавфсиз муҳитни шакллантириш мақсадида 3 566 та видеокузатув камераси, 1771 та “домофон” комплекси ва 751 та “ташвиш тугмаси” ўрнатилиб, 7 269 та объект техник қўриқловга олинди.
Амалга оширилаётган ушбу чора-тадбирлар натижасида жиноятларни тезкорлик билан фош этиш, уларни содир этган шахсларни аниқлаш ва жавобгарликнинг муқаррарлигини таъминлаш борасидаги ишлар самарадорлиги ошмоқда.
Шу билан бирга, содир этилган ҳар бир жиноят кунлик танқидий ва тезкор таҳлил қилиниб, улар бўйича суриштирув ва тергов ҳаракатларининг қонунийлиги ҳамда сифати устидан таъсирчан назорат ўрнатилган.
Азиз вилоятимиз аҳолиси !
Жиноятчиликка қарши курашишнинг энг самарали йўли – ҳуқуқбузарликларнинг барвақт олдини олиш, уларни келтириб чиқараётган сабаблар ва имкон бераётган шарт-шароитларни ўз вақтида аниқлаш ҳамда бартараф этишдир.
Жамиятда қонун устуворлиги, тинчлик ва осойишталикни таъминлаш фақат ҳуқуқни муҳофаза қилувчи органларнинг вазифаси эмас.
Бу – давлат идоралари, маҳалла фуқаролар йиғинлари, таълим муассасалари, меҳнат жамоалари, ота-оналар ва энг муҳими, ҳар бир фуқарорнинг умумий масъулиятидир.
Зеро, жиноятчиликка қарши курашишда ҳамжиҳатлик ва ўзаро масъулият муҳим аҳамият касб этади. Барчамизнинг биргаликдаги саъй-ҳаракатларимиз орқали маҳаллаларимизда ҳуқуқбузарликларнинг олдини олиш, фуқаролар осойишталигини таъминлаш ва хавфсиз муҳитни янада мустаҳамкамлаш мумкин.
Шу боис, ҳар биримиз юксак фуқаролик масъулиятини ҳис этган ҳолда, қонун талабларига қатъий риоя қилишимиз, жамиятда қонун устуворлигини қарор топтириш, маҳаллаларимизда тинчлик ва осойишталикни асраш ҳамда хавфсиз муҳитни таъминлашга муносиб ҳисса қўшишимиз зарур.
Қадрли юртдошлар !
Маҳалла фаоллари ва аҳолининг ҳамжиҳатликда олиб бораётган изчил ишлари ҳудудларимизда тинчлик ва осойишталикни сақлаш, ҳуқуқбузарликларнинг олдини олиш ҳамда хавфсиз муҳитни қарор топтиришда муҳим аҳамият касб этади.
Шу боис, ҳар биримиз қонун талабларига амал қилиб, жамият манфаатларига дахлдорлик ҳисси билан ёндашишимиз, ўзаро ҳурмат ва ҳамжиҳатликни мустаҳкамлаш орқали юртимиз фаровонлигига хизмат қилишимиз зарур.
Зеро, маҳалладаги осойишталик – оила хотиржамлиги, жамият барқарорлиги ва юрт тараққиётининг мустаҳкам пойдеворидир.
Эътиборингиз  учун  раҳмат!
А.Э. Мирзаев, Тошкент вилояти прокурори