Ассалому алайкум!

Азиз ва муҳтарама онахонлар, қадрли опа-сингиллар!

Аёл — ҳаётимиз файзи, оиланинг мустаҳкам таянчи, жамиятимизнинг маънавий устунидир, аёл борки, жамиятда  меҳру муҳаббат, хонадонларда файзу тароват ва саранжомлик ҳукмрон.

Шу ўринда Алишер Навоий бобомизнинг “Аёллар – фаришталарнинг опа-сингилларидир” деган ҳикматли сўзларини ёд олиш жоиздир.

Ҳурматли Президентимиз Шавкат Миромонович Мирзиёевнинг инсон қадрини улуғлашга қаратилган халқчил сиёсати замирида ҳам, энг аввало, аёлларни улуғлаш, уларнинг ҳуқуқ ва манфаатларини ҳимоя қилиш, муносиб шароит яратишдек эзгу ва хайрли мақсадлар мужассамлигини барчамиз чуқур англаймиз.

Ҳозирги кунда вилоятимиз аҳолисининг 1 миллион 584 мингдан ортиғини, яъни ярмидан кўпроғини хотин-қизлар ташкил этади.

Тошкент вилояти хотин-қизлари азал-азалдан меҳнатсевар, яратувчан бўлишлари билан бирга, илм, адабиёт, санъат, қўйингки, барча жабҳаларда пешқадам бўлиб келганлар.

Яқин ўтмишда яшаб, ўз ҳаёти ва фаолияти билан катта ибрат намуналарини қолдирган Саодат Гулаҳмедова, Анастасия Чудная, Любов Ли, Зулфия Зокирова, Мунаввар Исоқова, Турсуной Охунова каби меҳнат ва матонат тимсоллари бўлган онахонларимиз номини бутун халқимиз ҳурмат билан хотирлайди.

Беназир олима Музайяна Алавия, ёзувчи Фарида Усмонова, халқ ўқитувчилари Заҳро Аҳмедова, Раъно Фозилова, Ҳури Солиева, Махбурат Турдиева каби ёш авлод камолоти йўлида беқиёс хизмат қилган устозлар номларини ҳамиша миннатдорлик билан тилга оламиз.

Номлари тилга олинган юртдошларига муносиб ворис бўлиш йўлида заҳмат чекиб меҳнат қилаётган опа-сингилларимиз сони кўпайиб бораётгани айни бор ҳақиқатдир.

Бугун вилоятимизда 10 минг нафар аёллар раҳбарлик лавозимларида, 7,5 мингдан зиёд хотин-қизлар тадбиркорлик соҳасида, 38 мингдан ортиқроғи таълим тизимида, 48 минг нафарга яқини тиббиётда, 22 мингдан зиёд аёллар қишлоқ хўжалигида, 29 мингдан ортиқ хотин-қизлар эса давлат бошқаруви ҳамда ҳуқуқни муҳофаза қилиш ва суд идораларида эркаклар билан теппа-тенг  меҳнат қилишмоқда.

Биз ҳақли равишда фахрланадиган 872 нафар профессор-ўқитувчилар, яъни 44 нафар фан доктори, 58 нафар фалсафа доктори, 35 нафар профессор ва 234 нафар доцентлар айнан хотин-қизлар вакилларидир.

Шунингдек, 6 нафар Олий Мажлис Қонунчилик палатаси депутати, 1 нафар сенатор, 160 нафар маҳаллий Кенгаш депутатлари ҳам хотин-қизлардир.

Албатта, Янги Ўзбекистонда қилинган машаққатли меҳнат ва эришилган натижа ўз рағбатини топади. Бугун вилоятимизнинг 468 нафар аёллари турли давлат мукофотлари билан тақдирлангани бунинг тасдиғидир.

Куни кеча давлатимиз раҳбари томонидан 4 нафар опа-сингилларимиз давлат мукофотларига, 2 нафар қизларимиз эса Зулфия номидаги давлат мукофотига сазовор бўлдилар.

Фурсатдан фойдаланиб, уларни бундай юксак эътироф билан биргаликда табрикласак.

Ҳурматли тадбир иштирокчилари!

Бугун хотин-қизларни қўллаб-қувватлаш, уларнинг бандлигини таъминлаш ва аёллар тадбиркорлигини ривожлантириш масаласи давлат сиёсати даражасига кўтарилган.

Ўтган 2025 йилда республикамизда бўлгани каби, вилоятимизда ҳам 248 мингдан ортиқ ишсиз аёлларнинг бандлиги таъминланди, 31 мингдан зиёд аёлларга тадбиркорликни ривожлантириш учун 908 миллиард маблағ ажратилди. 13 мингдан ортиқ опа-сингилларимиз ўқитилди.

“Аёллар дафтари” орқали 89 мингдан ортиқ хотин-қизларга амалий ёрдам кўрсатилди, 5 нафар эҳтиёжманд хотин-қиз уй-жой билан таъминланди, 479 нафарининг уй-жойи таъмирланди.

Қадрли опа-сингиллар!

Жамиятдаги барқарорлик ва осойишталикнинг негизи оиладаги тотувликдир. Шу ўринда халқимиз учун муқаддас бўлган “оилада фарзанд тарбияси” бугун янада долзарб аҳамият касб этмоқда.

Бугун бутун дунёда ёшлар онгини эгаллаш, дунёқараши тор ва тарбиясида нуқсони бор фарзандларимиз миясига маънавиятимиз ва қадриятларимизга зид ғояларни сингдиришга бўлган ҳаракатлар кун сайин кўпаймоқда.

Бир сўз билан айтганда, болаларни бугун ўзимизники қилиб олмасак, бошқаларнинг уларга эга чиқиш хавфи кучаймоқда.

Қайси оилада аёл хушёр бўлса, бутун оилани борига қаноат қилиб яшашга ўргатса, хонадонларимиз фаришталари бўлмиш кекса онахонларимиз уларни илм олишга ва ҳунар эгаллашга ундасалар бугун биз кўп такрорлайдиган “тарбияси оғир”, “назоратга олинган”, “ишсиз” ёки “гиёҳванд” деган хунук атамалар салмоғи албатта камаяди.

Энди ҳаётга қадам қўйган келин-куёвларга яхши сўз билан берилган йўл-йўриқлар ва оналик насиҳатлари келгусида “отасиз ўсган болалар”, “алимент тўловчи эркаклар”, “боқувчисиз қолган аёллар” сонини умуман йўқ қилишга олиб келади.

Азалдан халқимизда бир доно нақл бор. “Уйдаги гап кўчага чиқса — хонадоннинг пурди кетади”, “Жанжалли оилада ўсган бола — меҳрдан ўксик”.

Хуллас, азиз онахонлар, опа-сингиллар, биз айтган меҳрни Сиздан бошқа ким бера олади, чақалоқ онгига алла орқали қадриятларимизни ким сингдиради олади? Бир дуо билан ҳар қандай ёмонни ким яхши қила олади? Сиз ва фақат Сиз!

Ҳурматли онахонлар, қадрли опа-сингиллар!

Шу файзли ва қутлуғ айёмда барчангизни чин дилдан табриклаймиз, мустаҳкам соғлик, хонадонларингизга файзу барака тилаймиз.

Нур юзли оналаримизнинг бугун улуғ Рамазон ойларидаги ибодатларда қилаётган дуолари ижобат бўлсин.

Жонажон Ўзбекистонимиздаги тинчликка кўз тегмасин, барчангизга фарзандлар, набираю эваралар бахту саодатини, иқболини кўриш насиб қилсин!

Байрамингиз муборак бўлсин!