Рим музокаралари: муҳокама марказида чиқиндиларни қайта ишлашдан тортиб замонавий агротехнологияларгача
2026-05-15 15:35:00 / Янгиликлар
Тошкент вилояти ҳокими Зойир Мирзаев бошчилигидаги вилоят делегациясининг Италия Республикасига сафари давом этмоқда.
Кеча ва бугун делегациямиз 10 га яқин компания ва ташкилотлар, йирик сармоядорлар вакиллари билан музокаралар олиб борди.
Хусусан, Рим шаҳрида “Hafner” компанияси асосчиси ва президенти Генри Хафнер билан чиқиндиларни қайта ишлаш соҳасида ҳамкорлик имкониятлари муҳокама қилинди.
Шунингдек, “Gamma Meccanica” компанияси вакиллари билан фойдали қазилмаларни қайта ишлаш йўналишида музокаралар олиб борилган бўлса, машҳур “Nord Engineering” компаниясининг стратегик ривожланиш директори ва компания акциядори Марко Майраги билан чиқиндиларни йиғиш ва қайта ишлаш соҳасида истиқболли лойиҳалар юзасидан фикр алмашилди.
“AGCO ITALIA SPA” компаниясининг бизнесни ривожлантириш директори Джиллес Ливенс билан учрашувда қишлоқ хўжалиги техникаси, замонавий агротехнологияларни жорий этиш ва соҳада кооперацияни кенгайтириш масалалари муҳокама марказида бўлди.
Муҳим мулоқотлардан яна бири —Италия қишлоқ хўжалиги бош конфедерацияси — “Confagricoltura” бош қароргоҳида бўлиб ўтди.
Унда мазкур конфедерация вице-президенти Л. Бронделло, “CIVI-Italia” уюшмаси директори Л. Каталано ҳамда иссиқхона соҳасида фаолият юритувчи “Europrogress” ва “Idromeccanica” компаниялари вакиллари иштирокида кенгайтирилган давра суҳбати ташкил этилди.
Мулоқотда агросаноат, интенсив боғдорчилик, иссиқхона хўжалиги ва замонавий агротехнологиялар соҳасида ҳамкорлик масалалари муҳокама қилинди.
Умуман, италиялик шериклар, ишбилармон доиралар вакиллари билан тиғиз график асосида ташкил этилган учрашувларда инвестициявий ҳамкорликни мустаҳкамлаш, инновацион технологияларни жалб этиш ҳамда Тошкент вилоятида саноат ва агросаноат тармоқларини ривожлантиришга қаратилган лойиҳаларни амалга ошириш юзасидан муҳим таклифлар ўртага ташланиб. уларни амалга ошириш имкониятлари кўриб чиқилди.