Термиз тумани ҳокими Шухрат Қаландаровнинг туман аҳолиси ва ёшларига мурожаати
2026-06-17 18:30:00 / Раҳбариятнинг баёнотлари ва нутқлари
Ҳурматли тумандошлар! Азиз ёшлар!
Бугунги кунда гиёҳвандлик ва психотроп моддалар истеъмоли нафақат бир инсоннинг ҳаёти ва саломатлигига, балки оила тинчлиги, маҳалла осойишталиги ва жамият тараққиётига ҳам жиддий хавф туғдираётган долзарб муаммолардан бири ҳисобланади. Бу иллат инсоннинг соғлиғини издан чиқариб, унинг орзу-интилишлари ва келажак режаларига путур етказади.
Юртимизда ёшларнинг билим олиши, замонавий касб-ҳунарларни эгаллаши, спорт билан мунтазам шуғулланиши ва тадбиркорлик фаолиятини йўлга қўйиши учун кенг имкониятлар яратилмоқда. Ана шундай шароитда айрим ноқонуний кучларнинг гиёҳвандлик воситалари ва психотроп моддаларни тарқатишга бўлган уринишлари ҳар биримиздан огоҳлик ва фуқаролик масъулиятини талаб этади.
Азиз ёшлар!
Сизлар мамлакатимиз келажаги, Янги Ўзбекистоннинг ишончли таянчисиз. Ҳаётингиз ва келажагингизга салбий таъсир кўрсатадиган ҳар қандай зарарли одатлардан узоқ бўлинг. Бўш вақтингизни илм-фан, спорт, китобхонлик, касб ўрганиш ва эзгу мақсадларга эришиш йўлида самарали сарфланг. Унутманг, соғлом турмуш тарзи — муваффақиятли ва бахтли ҳаётнинг энг мустаҳкам асосидир.
Ҳурматли ота-оналар, устозлар ва маҳалла фаоллари!
Фарзандларимизнинг тарбияси ва келажаги учун барчамиз бирдек масъулмиз. Уларнинг қизиқишлари, атрофидаги муҳити ва кундалик машғулотларига бефарқ бўлмайлик. Оила, таълим муассасалари ва маҳалла ҳамкорлиги орқали ёшларимизни турли зарарли таъсирлардан асраш, уларни соғлом ва баркамол инсонлар этиб вояга етказишимиз мумкин.
Шу муносабат билан барча юртдошларимизни гиёҳвандликка қарши курашда фаол иштирок этишга, ёшлар ўртасида соғлом турмуш тарзини тарғиб қилишга ва келажагимиз эгалари бўлган фарзандларимизни асраб-авайлаш йўлида бирлашишга чақираман.
Келажагимиз, фарзандларимиз ва юртимиз равнақи учун биргаликда ҳаракат қилайлик!
Соғлом авлод — хавфсиз ва фаровон жамият пойдеворидир.