Келажак маҳалласида 90 ўринли янги давлат мактабгача таълим ташкилоти фойдаланишга топширилди
2026-03-27 14:05:00 / Янгиликлар
Термиз туманининг Келажак маҳалласида умумий қиймати 1 млрд 140 млн сўмлик лойиҳа доирасида барпо этилган 90 ўринли янги давлат мактабгача таълим ташкилоти фойдаланишга топширилди. Тантанали очилиш маросимида Термиз тумани ҳокими Шухрат Қаландаров иштирок этиб, маҳалла аҳлини ушбу қувончли воқеа билан самимий қутлади.
Мазкур боғчанинг ишга туширилиши натижасида Янгиер ва Келажак маҳаллаларидаги 90 нафар мактабгача таълим ёшидаги болалар қамраб олинади. Шу билан бирга, 24 та янги доимий иш ўрни яратилди.
Туман раҳбари нуронийлар ва иштирокчилар билан янги боғчада яратилган замонавий шарт-шароитлар билан танишди ҳамда тарбияланувчиларга совғалар топширди.
Янги боғча – келажагимиз эгалари бўлган фарзандларимиз учун янада қулай ва замонавий таълим-тарбия муҳитини яратиш йўлида навбатдаги қадам бўлди.
Маълумот ўрнида, бунга қадар тумандаги мактабгача таълим ташкилотлари сони 118 тани ташкил этиб, қамров даражаси 89,5 фоизга етган эди. Янги муассасанинг ишга туширилиши натижасида мазкур кўрсаткич 90 фоиздан ошди.