ОНА ТИЛИМИЗНИ АСРАБ-АВАЙЛАШ ВА ҚАДРЛАШ УЧУН БАРЧАМИЗ БИРЛАШИШИМИЗ КЕРАК
2024-10-19 12:45:00 / Янгиликлар
Инсон учун киндик қони томган Ватани, дунёга келтириб вояга етказган ота-онаси қанчалик азиз ва мукаррам бўлса, унинг ўзлиги ва маънавий оламини белгилайдиган она тили ҳам шунчалик қадрли ва мўътабардир.
Халқимиз тафаккурининг тиниқ кўзгуси бўлган бу бебаҳо хазинани асраб-авайлаш ва ривожлантириш бугунги кундаги энг шарафли вазифаларимиздан биридир.
Маълумотларга қараганда, бугунги кунда жаҳон миқёсида
50 миллионга яқин киши ўзбек тилида сўзлашмоқда. Кўплаб мамлакатларда бу гўзал ва жозибали тил катта иштиёқ билан ўрганилади.
Улуғ мутафаккир Мир Алишер Навоий бобомизнинг: “Тилга эътибор – элга эътибор”, деган доно ўгитларига амал қилган ҳолда, юртимизда тил масаласида олиб борилаётган давлат сиёсати инсон қадрини улуғлашга қаратилган туб ислоҳотларимизга ҳар томонлама уйғун ва ҳамоҳангдир.
Бугун Сув хўжалиги вазирлигида “Қадринг баланд бўлсин, Она тилим!” мавзусида маданий-маърифий тадбир ўтказилди. Уни вазирнинг биринчи ўринбосари Тимур Бутунбаев очиб берар экан, сўнгги йилларда мамлакатимизда ўзбек тилини ривожлантириш, унинг ҳаётимиздаги ўрни ва таъсирини ошириш борасида янги босқич бошланганлигини таъкидлади.
Сув хўжалиги вазирлиги тизимида меҳнат қилаётган ишчи-ходимлар ҳам миллий ўзлигимиз ва ғуруримиз тимсоли бўлган она тилимизни асраб-авайлаш ва ривожлантиришдек шарафли ишга муносиб ҳисса қўшиб келаётгани эътироф этилди.
Тадбирда Ўзбекистон Ёзувчилар уюшмаси аъзоси, олима, фалсафа фанлари доктори, “Меҳнат Шуҳрати” ордени соҳибаси, “Ўзбекистон Республикасида хизмат кўрсатган ёшлар муррабийси” Жамила Тошпўлатовна Шермуҳамедова, Алишер Навоий номидаги Тошкент давлат ўзбек тили ва адабиёти университети илмий ходими Мавлуда Орипова, Ўзбекистон Фанлар академияси Ўзбек тили, адабиёти ва фольклор институти катта илмий ходими Абдуманнон Ҳасановнинг чиқишлари тингланди.
Айниқса, Жамила Шермуҳаммедованинг “Она тилимизни ҳимоя қилиш, асраб-авайлаш ва қадрлаш учун бугун барчамиз бирлашишимиз керак” деган ўта ҳароратли фикрларини иштирокчилар қизғин қўллаб-қувватлади.
Ахборот хизмати