ХОДИМЛАРНИНГ ЖАҲОН САВДО ТАШКИЛОТИ ҲАҚИДАГИ БИЛИМЛАРИ ОШИРИЛДИ
2024-10-18 16:20:00 / Янгиликлар
Бугун Сув хўжалиги вазирлигида ходимларнинг Жаҳон савдо ташкилоти тамойиллари ва мажбуриятлари ҳақида билимини оширишга қаратилган семинар ўтказилди.
Унда Адлия вазирлигининг Миллий қонунчиликни ЖСТ битимларига уйғунлаштириш бошқармаси бош маслаҳатчиси Искандар Генджаев, Иқтисодиёт ва молия вазирлигининг Сув хўжалигини молиялаштириш бошқармаси бошлиғи Шуҳрат Абдумаджидов, Инвестициялар, саноат ва савдо вазирлигининг ЖСТ бошқармаси бошлиғи Мирсолиқ Мираҳмедов ўз тақдимотлари билан иштирок этиб, келиб тушган саволларга жавоб қайтарди.
Таъкидландики, ЖСТ товарлар, хизматлар ва интеллектуал мулк объектлари халқаро савдоси соҳасида “камситмаслик” тамойили устуворлигини таъминлашга қаратилган ташкилот ҳисобланади. Ушбу тамойил асосида аъзо давлатлар томонидан ўз савдо ҳамкорлари, шунингдек, хорижий ва маҳаллий ишлаб чиқарувчи, хизмат кўрсатувчилар орасида камситишга йўл қўйилмаслиги таъминланади.
Натижада ЖСТга аъзо ҳар бир давлат халқаро савдонинг тенг ҳуқуқли субъекти сифатида бошқа аъзолар билан бир хил имкониятлар асосида ташқи иқтисодий ва савдо муносабатларини олиб боради.
Семинарда ЖСТнинг тамойиллари ва мажбуриятлари тўғрисида айтиб ўтилди. Ўзбекистоннинг ЖСТга аъзо бўлиши билан боғлиқ ҳуқуқий мажбуриятлар ва миллий қонунчиликка киритилаётган ўзгаришлар ҳақида маълумот берилди. Хусусан, ЖСТга аъзо бўлишнинг сув хўжалиги соҳасига бўладиган таъсири, хорижий инвестицияларни жалб қилиш имкониятлари ва молиялаштириш масалаларига ҳам эътибор қаратилди.
Ахборот хизмати