Фарғона вилояти Сўх тумани ҳокимлиги

Омск вилоятига амалий ташриф билан борган Сўх тумани делегацияси бугун Омск шаҳридаги Королёв боғида ташкил этилган «АгроОмск–2026» қишлоқ хўжалиги кўргазма-ярмаркасида иштирок этди.
 
Сўх тумани ҳокими Сайидбаҳром Сайидмусаев бошчилигидаги делегациянинг Омск вилояти губернатори Виталий Хоценко билан мулоқоти ҳам бўлиб ўтди. Суҳбат давомида ҳудудлар ўртасидаги ўзаро манфаатли алоқаларни янада кенгайтириш, айниқса, қишлоқ хўжалиги, инвестиция ва тадбиркорлик йўналишларида ҳамкорликни ривожлантириш масалаларига эътибор қаратилди.
 
🌾 «АгроОмск–2026» кўргазмасида замонавий қишлоқ хўжалиги техникалари, чорвачилик йўналишидаги янгиликлар, қайта ишлаш саноати маҳсулотлари, илмий ишланмалар ва агросаноат соҳасидаги инновацион ечимлар намойиш этилмоқда. Шунингдек, кўргазма доирасида соҳа мутахассислари иштирокида семинарлар, давра суҳбатлари ва ишбилармонлик мулоқотлари ташкил этилган.
 
Сўхлик меҳмонлар кўргазма майдонларини кўздан кечириб, қишлоқ хўжалигида қўлланилаётган замонавий технологиялар, техника ва ускуналар, маҳсулот етиштириш ҳамда қайта ишлаш борасидаги илғор тажрибалар билан яқиндан танишдилар.
 
Айниқса, Сўх туманида интенсив боғдорчиликни ривожлантириш, сув тежамкор технологияларни кенг жорий этиш, картошка ва бошқа қишлоқ хўжалиги маҳсулотларини етиштириш ҳажмини ошириш, чорвачилик ҳамда маҳсулотларни қайта ишлаш йўналишларида Омск тажрибасини ўрганиш ва келгусида ўзаро манфаатли лойиҳаларни йўлга қўйиш имкониятларига алоҳида эътибор қаратилди.
 
Айни дамда Сўх тумани делегациясининг Омск вилоятидаги амалий ташрифи давом этмоқда. Ташриф доирасида маҳаллий тадбиркорлар, қишлоқ хўжалиги ишлаб чиқарувчилари ва инвесторлар билан учрашувлар ўтказиш, истиқболли ҳамкорлик лойиҳаларини муҳокама қилиш режалаштирилган.
 
Сўх тумани ҳокимлиги Ахборот хизмати