Сўхда шоир Сидиқ Мўминнинг 70 йиллик юбилейига бағишланган ижодий кеча ўтказилмоқда
2026-05-13 11:15:00 / Янгиликлар
Айни дамда Сўх тумани маданият марказининг мажлислар залида шоир, ёзувчи, олим, публицист ва педагог Сидиқ Мўминнинг 70 йиллик юбилейига бағишланган ижодий кеча бўлиб ўтмоқда.
Тантанали тадбирда шоирнинг шахсан ўзи иштирок этаётгани кечага янада кўтаринки руҳ, файз ва шукӯҳ бағишламоқда.
Тадбир Сўх тумани ҳокими ўринбосари Илҳомжон Абдумажидовнинг кириш сўзи билан очилди. У ўз нутқида Сидиқ Мўминнинг мамлакатимиз адабиёти, маънавияти ва ёшлар тарбиясига қўшган муносиб ҳиссаси ҳақида алоҳида тўхталиб ўтди.
Ижодий кечада Ўзбекистон Ёзувчилар уюшмаси Фарғона вилояти бўлими вакиллари ҳам иштирок этиб, Сидиқ Мўмин ижоди, унинг инсоний фазилатлари ҳамда Сўх туманининг бой маънавий муҳити хусусида самимий фикр-мулоҳазаларини билдирдилар. Шунингдек, шоирнинг 70 йиллик юбилейига бағишланган тантанали тадбирлар айнан Сўх туманидан бошланаётгани алоҳида мамнуният билан қайд этилди.
Кеча давомида шоир қаламига мансуб шеърлар асосида яратилган қўшиқлар санъаткорлар томонидан ижро этилмоқда. Ёш ижодкорларнинг чиқишлари, шеърхонлик кечалари ҳамда шоирнинг самимий мулоҳазалари тадбирга янада ўзига хос мазмун ва руҳ бағишламоқда.
Мазкур ижодий кеча адабиёт ва санъат ихлосмандлари учун унутилмас маънавий байрамга айланиб улгурди.
Сўх тумани ҳокимлиги Ахборот хизмати