Сирдарё тумани ҳокими томонидан аҳоли ҳамда тадбиркорлар иштирокида инфратузилма лойиҳалари юзасидан очиқ мулоқот ўтказилди.
2026-09-18 18:00:00 / Янгиликлар
Дастлаб, Сирдарё туманининг «Хазина» ва «Ишонч» маҳаллалари, Улуғ йўл кўчасида жойлашган нотурар объектлар билан боғлиқ масалалар ўрганилди.
Мазкур ҳудудларда жамоат эҳтиёжлари учун реновация ишларини амалга ошириш, инфратузилмани яхшилаш ҳамда замонавий шаҳарсозлик талабларига мос шароитларни яратиш мақсадида қатор лойиҳаларни амалга ошириш режалаштирилган.
Очиқ мулоқот давомида 24 та нотурар жой мулкдорлари, тадбиркорлар ҳамда аҳоли вакиллари билан учрашилиб, уларнинг фикр-мулоҳазалари, таклиф ва мурожаатлари тингланди.
Мулоқотда мулкдорларни қизиқтираётган масалалар атрофлича муҳокама қилиниб, уларнинг саволларига масъуллар томонидан тегишли тушунтиришлар берилди.
Шундан сўнг, ишчи гуруҳнинг кейинги манзили «Баҳор» ва «Ёшлик» маҳаллалари ҳудуди бўлди.
Мазкур маҳаллалардан ўтувчи Гулистон ва Ишбилармонлар кўчаларининг жами 0,64 километр қисмида қурилиш-таъмирлаш ишлари амалга оширилиши муносабати билан йўл вақтинча ёпилиши маълум қилинди.
Лойиҳа доирасида ҳудудда канализация ва ичимлик суви тармоқлари, автомобиль йўли, пиёдалар йўлаклари ҳамда лотоклар барпо этилиши режалаштирилган.
Туман ҳокими Азизбек Турдимуродов учрашувлар давомида ҳар бир масалани жойида ўрганиш, фуқаролар ва тадбиркорларнинг қонуний манфаатларини инобатга олиш, барча жараёнларни очиқ ва қонуний асосда олиб бориш муҳимлигини таъкидлади.
Шунингдек, билдирилган таклиф ва мурожаатларни белгиланган тартибда ўрганиш, мавжуд муаммоларни бартараф этиш ҳамда келгусидаги ишларни аҳоли ва тадбиркорлар билан ҳамкорликда ташкил этиш юзасидан масъулларга тегишли топшириқлар берилди.