Кичик бизнес ва тадбиркорликни ривожлантириш
2025-04-07 16:25:00 / Янгиликлар
Кичик бизнес ҳар қандай мамлакатда иқтисодий ўсиш ва инновацияларнинг двигателидир. Улар иш ўринлари яратиш, рақобатни кучайтириш ва мамлакатнинг умумий фаровонлигига ҳисса қўшишда ҳал қилувчи роль ўйнайди. Тадбиркорлик фаолиятини бошлаш ва уни бошқариш жараёни кичик бизнес ривожланишининг таянчидир.Ўзбекистонда ижтимоий йўналтирилган бозор иқтисодиётини барпо этишнинг асосий мақсадларидан бири кичик бизнесни устувор даражада ривожлантиришдан иборат. Бу мақсадни амалга ошириш учун босқичма-босқич иқтисодий ислоҳотлар ўтказилиб келинмоқда, кичик бизнеснинг ролини ошириш учун йирик институционал асослар яратилди. Кичик бизнес фаолиятини ташкил этиш, эркин фаолият юритишини кафолатловчи ҳуқуқий-меъёрий ҳужжатлар, кичик бизнесга кўмаклашувчи бозор инфратузилмаси шакллантирилди. Натижада бугунги кунга келиб, кичик бизнес субъектлари мамлакатимиз иқтисодиётининг барча жабҳаларида, машинасозлик маҳсулотларини ишлаб чиқаришда, истеъмол товарлари, қишлоқ хўжалиги ва озиқ-овқат маҳсулотларини ишлаб чиқаришда, сервис хизматлари кўрсатиш ва туризм каби соҳаларда фаолият кўрсатмоқдалар. 2022-2026-йилларга мўлжалланган Янги Ўзбекистоннинг тараққиёт стратегиясининг 29-мақсадига кўра, тадбиркорлик фаолиятини ташкил қилиш ва доимий даромад манбаларини шакллантириш учун шароитлар яратиш, хусусий секторнинг Ялпи ички маҳсулотдаги улушини 80 фоизга ва экспортдаги улушини 60 фоизга етказиш белгиланган. Муҳим вазифалар сифатида ҳудудларда 200 та янги саноат зоналарини ташкил этиш ва бизнес-инкубаторлар тизимини ривожлантириш, шароити оғир бўлган туманларда тадбиркорликни ривожлантириш учун янада қулай шарт-шароитлар яратиш, ҳудудларда тадбиркорликни қўллаб-қувватлаш, ишсизлик ва камбағалликни қисқартириш бўйича мавжуд тузилмалар фаолиятини такомиллаштириш, иқтисодиётда давлат иштирокини қисқартириш ва хусусий секторга кенг йўл очиш, иқтисодий муносабатларда эркин бозор тамойилларини жорий этишни кенгайтириш кабилар алоҳида белгилаб қўйилган. Мамлакатимиз ҳудудларида камбағалликни қисқартириш ва аҳоли бандлигини ошириш, ўзини-ўзи банд қилишда кичик бизнес ва хусусий тадбиркорликни янада ривожлантириш муҳим аҳамиятга эга. Мамлакатимизда кичик бизнесни ривожлантириш бўйича тўпланган тажрибалар шуни кўрсатадики, корхоналарнинг рақобатдошлик даражасини ошириш уларнинг ўз фаолиятлари давомида кенгайиб, йириклашиб боришини тақозо этади.
М.Сатторов
Шўрчи туман статистика бўлими бошлиғи