Бухоро вилояти Шофиркон тумани ҳокимлиги

Хитойлик инвесторлар иштирокида амалга оширилаётган мазкур лойиҳа нафақат Шофиркон тумани, балки бутун Бухоро вилояти учун муҳим саноат лойиҳаларидан бири сифатида эътироф этилмоқда. Корхона раҳбари, хитойлик инвестор Зоу Лонг ташаббуси билан бунёд этилаётган ушбу ишлаб чиқариш мажмуасининг умумий қиймати 7 миллион АҚШ долларини ташкил этади.

Лойиҳанинг аҳамиятли жиҳати шундаки, корхонага ўрнатилган барча асосий технологик ускуналар тўғридан-тўғри Хитой Халқ Республикасидан олиб келинган бўлиб, ишлаб чиқариш жараёнлари замонавий стандартлар ва илғор технологиялар асосида йўлга қўйилмоқда. Бу эса маҳсулот сифатини ошириш билан бирга корхонанинг рақобатбардошлигини таъминлайди.

Бугун корхона фаолиятида муҳим тарихий воқеа юз берди. Ишлаб чиқариш мажмуасининг биринчи линияси ишга туширилиб, илк маҳсулотлар ишлаб чиқарилди. Ҳозирги кунда дастлабки босқичдаги ишлаб чиқариш жараёнлари олиб борилмоқда. Мутахассисларнинг таъкидлашича, ишлаб чиқарилган қувурлар сифат назорати талабларидан келиб чиқиб, махсус ускуналар ёрдамида босим остида синовдан ўтказилади. Бу эса маҳсулотларнинг мустаҳкамлиги ва сифат кўрсаткичларини халқаро талабларга мослигини таъминлайди.

Корхонанинг йиллик ишлаб чиқариш қуввати ҳам салмоқли кўрсаткичларга эга. Лойиҳа тўлиқ қувватда ишга туширилгач, йилига 900 тонна томчилаб суғориш лентаси, 3 минг тонна ПВХ қувурлари ҳамда 800 тонна сув қувурлари ишлаб чиқарилиши режалаштирилган.

Бугунги кунда сув ресурсларидан оқилона фойдаланиш қишлоқ хўжалигининг энг долзарб масалаларидан бири ҳисобланади. Шу нуқтаи назардан, томчилаб суғориш тизимлари учун зарур бўлган маҳсулотларни маҳаллийлаштириш нафақат иқтисодий самарадорликни оширади, балки сув тежовчи технологияларни кенг жорий этишга ҳам хизмат қилади.

Мазкур лойиҳа орқали 70 нафар фуқаро доимий иш ўрни билан таъминланади. Корхонада замонавий технологиялар асосида ишлаш учун мутахассислар тайёрланиб, янги ишлаб чиқариш маданияти шакллантирилмоқда. Бу эса ёшларнинг бандлигини таъминлаш, аҳоли даромадларини ошириш ва ҳудудда янги касбий кўникмаларни ривожлантиришга хизмат қилади.

Корхонанинг яна бир муҳим жиҳати унинг экспортга йўналтирилганлигидир. Бу ерда ишлаб чиқариладиган маҳсулотлар ички бозор талабини қондириш билан бирга Афғонистон, Туркманистон ва Қозоғистон давлатларига экспорт қилинади. Лойиҳанинг тўлиқ ишга туширилиши натижасида йилига 4 миллион АҚШ доллари миқдорида экспорт амалга оширилиши кутилмоқда.

Бу эса Шофиркон туманининг экспорт салоҳиятини ошириш, ҳудудга валюта тушумларини кўпайтириш ҳамда маҳаллий саноатнинг халқаро бозорлардаги ўрнини мустаҳкамлашда муҳим омил бўлади.

Туман ҳокимининг корхонага ташрифи давомида ишлаб чиқариш жараёнлари, технологик ускуналар фаолияти ва лойиҳа истиқболлари билан яқиндан танишилди. Таъкидланганидек, бундай йирик инвестиция лойиҳалари туманнинг саноат салоҳиятини янги босқичга олиб чиқади, хорижий инвесторлар учун янада жозибадор муҳит яратади ва Шофирконни замонавий саноат марказларидан бирига айлантиришга хизмат қилади.

Энг муҳими, бугун илк маҳсулотини ишлаб чиқарган ушбу корхона Шофиркон туманида инвестицияларни жалб этиш борасида амалга оширилган энг йирик ва истиқболли лойиҳалардан бири сифатида тарихга кириб, ҳудуд иқтисодиётининг янги ўсиш нуқтасига айланмоқда.