Бир хонадондан бир нечта даромад манбаи
2026-04-10 00:50:00 / Янгиликлар
Тадбиркорнинг биринчи йўналиши — қўзиқорин етиштиришдир. У хонадонининг бир хонасида “вишинка” навли қўзиқорин етиштиришни йўлга қўйган. Мазкур лойиҳа учун атиги 1,5 миллион сўм маблағ сарфланган бўлса, биринчи ҳосил йиғимида қарийб 3,5 миллион сўмлик маҳсулот сотилган. Айни пайтда иккинчи ҳосилдан 250 килограммга яқин қўзиқорин олиш режалаштирилмоқда. Маҳсулотлар бозорга чиқарилганда харидорлар талабининг юқорилиги сабабли сотишда ҳеч қандай қийинчилик кузатилмаяпти. Қўзиқоринлар 35 минг сўмдан сотилмоқда.
Иккинчи йўналишда эса Шерали ака нонвойхона фаолиятини йўлга қўйган. Бу ерда нон ва патир маҳсулотлари ишлаб чиқарилмоқда. Кунига ўртача 200 дона патир ёпилиб, ҳар бири 18 минг сўмдан сотилмоқда. Ушбу йўналиш тадбиркорга кунлик қарийб 400 минг сўм даромад келтирмоқда.
Яна бир янги бошланган йўналиш — иссиқхоначиликдир. Хонадонидаги 1 сотих ер майдонида иссиқхона ташкил этилиб, унда помидорнинг “Аламина” навидан 250 туп кўчат экилган. Ҳозирда ушбу йўналишда ҳам самарали натижаларга эришиш устида иш олиб борилмоқда.
Давлатимиз томонидан Солиев Шерали хонадонига иссиқхоначилик ва чорвачилик йўналишларини ривожлантириш учун 150 миллион сўмлик имтиёзли кредит ажратилган. Ушбу маблағлар ҳисобидан 5 бош йирик шохли ва 10 бош майда шохли чорва моллари харид қилиниб, тадбиркорлик фаолияти янада кенгайтирилган.
Келгусида эса тадбиркор қулупнай етиштириш ҳамда қопларда картошка етиштиришни йўлга қўйишни режалаштирмоқда. Унинг таъкидлашича, меҳнат қилган инсон ҳеч қачон кам бўлмайди.
Дарҳақиқат, Солиев Шералининг меҳнацеварлиги, изланиши ва ташаббускорлиги бугунги кунда кўплаб оилалар учун ибрат бўлиб хизмат қилмоқда. Бу каби фидойи инсонлар юртимизда тадбиркорлик муҳитини янада ривожлантиришда муҳим ўрин тутади.