“Мингчинор Чеварлари” – экологияга ҳисса қўшаётган замонавий корхона
2026-02-27 23:00:00 / Янгиликлар
Корхона ташкил этилишида жами 2,5 миллиард сўм маблағ йўналтирилган бўлиб, шундан 1,5 миллиард сўми банк кредити, 1 миллиард сўми эса тадбиркорнинг ўз маблағлари ҳисобидан молиялаштирилган.
Бугунги кунда хорижий давлатларда экологияга зарар етказмаслик мақсадида селофан пакетлардан босқичма-босқич воз кечилмоқда. Пластик чиқиндиларни камайтириш сиёсати натижасида қайта фойдаланиш мумкин бўлган матоли эcо-сумкаларга талаб кескин ошди.
Айнан шу эҳтиёжни инобатга олган ҳолда “Мингчинор Чеварлари” корхонаси турли ҳажм ва дизайндаги эко-сумкалар ишлаб чиқаришни йўлга қўйган. Бундан ташқари, ресторанлар учун сочиқлар ва дастурхонлар (скатерлар) ҳам тайёрланади.
Маҳсулотлар Германия, Полша ва Россия давлатларига экспорт қилинмоқда. Корхонанинг экспорт ҳажми 100 минг АҚШ долларига етган.
Ҳозирда корхонада 60 нафар хотин-қиз доимий иш билан таъминланган. Шунингдек, ногиронлиги бўлган ва ёш болали 20 нафар аёлга уйида ишлаши учун тикув машиналари берилиб, улар касаначилик асосида фаолият юритмоқда. Улар ишлаб чиқарган маҳсулот ҳажмига қараб ойига ўртача 2–4 миллион сўм даромад топмоқда.
Корхонада ишчи-хотин-қизлар учун иссиқ овқат ташкил этилган. Бундан ташқари, боқувчисини йўқотган ва эҳтиёжманд оилаларга мунтазам равишда моддий ва маънавий ёрдам кўрсатиб келинмоқда.
Бугунги кунда корхона бир кунда 5–6 минг дона, ойига эса 200 минг дона маҳсулот ишлаб чиқармоқда.
Корхона раҳбарияти ишлаб чиқариш қувватини янада кенгайтириш ниятида. Жорий йилнинг 3-чорагида қўшимча 50 та янги иш ўрни яратиш режалаштирилган.
Шу тариқа, туман марказидан узоқда жойлашган Мингчинор маҳалласида ташкил этилган мазкур корхона нафақат экспортбоп маҳсулот ишлаб чиқармоқда, балки аёллар бандлигини таъминлаш, экологияни асраш ва ижтимоий ҳимояга муҳтож оилаларни қўллаб-қувватлаш орқали жамият ривожига муносиб ҳисса қўшмоқда.