Бухоро вилояти Шофиркон тумани ҳокимлиги

Ҳисобот аввалида таъкидланганидек, халқимиз азалдан бахт деганда тинчлик, хотиржамлик, сиҳат-саломатлик, фарзандлар камоли ҳамда эл-юрт олдида юзи ёруғ бўлишни асосий мезон деб билган. Муҳтарам Президентимиз ҳам доимо хавфсизлик ва аҳоли саломатлигини энг муҳим масалалар сифатида эътироф этиб, жамиятдаги барқарор тараққиётнинг мустаҳкам пойдевори тинчлик ва осойишталик эканини алоҳида таъкидлаб келмоқдалар.

Бугунги мураккаб ва таҳликали замонда ижтимоий тармоқлар орқали ёшлар онгига “оммавий маданият”, “сохта демократия”, нотўғри диний тушунчалар сингдирилаётгани, бу эса ёшлар тарбияси ва хавфсизлигига жиддий таҳдид солаётгани қайд этилди. Шу боис, ёшлар орасида жиноятчиликнинг олдини олиш масаласи бугунги кунда долзарб вазифалардан бири ҳисобланади.

Умумий жиноятчилик ҳолати
Ҳисоботда келтирилишича, 2025 йилнинг 12 ойи давомида Шофиркон тумани ҳудудида жами 278 та жиноят содир этилган бўлиб, бу кўрсаткич 2024 йилга нисбатан 44,29 фоизга камайган (499 та). Олдини олиш мумкин бўлган жиноятлар 144 тани ташкил этиб, 17,24 фоизга қисқарган. Аниқланган жиноятлар сони эса 118 тага етиб, ўтган йилга нисбатан 38,8 фоизга ошган.

Шунингдек, 16 та жиноят ахборот технологияларидан фойдаланган ҳолда содир этилган. Олдини олиш мумкин бўлган жиноятлар умумий жиноятчиликнинг 51,3 фоизини ташкил этиб, бу кўрсаткич бўйича Шофиркон тумани вилоятда 5-ўринда қайд этилган. Ҳисобот даврида босқинчилик, талончилик, номусга тегиш ва автомашина олиб қочиш каби жиноятларга йўл қўйилмади.

Вояга етмаганлар жиноятчилиги таҳлили
2025 йил давомида 13 нафар вояга етмаган шахс томонидан 12 та жиноят содир этилиб, бу кўрсаткич ўтган йилга нисбатан 42 фоизга камайган. Вояга етмаганлар томонидан асосан ўғрилик ва тан жароҳати етказиш жиноятлари содир этилган.

Мазкур жиноятларни содир этган вояга етмаганларнинг:

6 нафари мактаб ўқувчиси,

3 нафари техникум ўқувчиси,

4 нафари норасмий ишловчи шахслар ҳисобланади.

Вояга етмаганлар жиноятчилиги асосан Доригар, Боғиафзал ва М. Чандир МФЙлари ҳудудларида юқори экани қайд этилди. Айрим ҳолатларда вояга етмаганларнинг гуруҳ бўлиб жиноят содир этиши алоҳида ташвиш уйғотаётгани таъкидланди.

Ёшлар жиноятчилиги ҳолати
Ҳисобот даврида 45 нафар ёш томонидан жами 52 та жиноят содир этилган бўлиб, бу кўрсаткич ўтган йилга нисбатан 20 фоизга камайган. Ёшлар томонидан содир этилган жиноятлар асосан тан жароҳати етказиш, ўғрилик, фирибгарлик ва безорилик жиноятларидан иборат.

Жиноят содир этган ёшларнинг:

1 нафари олий таълим муассасаси талабаси,

1 нафари тайёрлов курси талабаси,

4 нафари аёллар,

4 нафари муқаддам судланган шахслардир.

Ёшлар жиноятчилиги Ш. Рашидов, Зарчабек ва Доригар МФЙлари ҳудудларида нисбатан юқори экани таъкидланди. Таҳлиллар шуни кўрсатмоқдаки, ёшларни иш билан таъминламаслик, оилавий муҳитни ўрганмаслик ва мавжуд муаммоларни ўз вақтида аниқламаслик жиноят содир этилишига сабаб бўлмоқда.

Профилактика ва ташкилий чора-тадбирлар
Ёшлар томонидан жиноят содир этилишининг олдини олиш мақсадида 68 нафар ёш ички ишлар органлари раҳбарларига бириктирилди. Улар билан индивидуал ишлаш йўлга қўйилиб, мавжуд муаммолар асосида “йўл хариталари” ишлаб чиқилди ва соғлом турмуш тарзига қайтариш бўйича профилактик тадбирлар олиб борилмоқда.

Президентнинг 2026 йил 5 январдаги ПҚ–1-сон қарори ижросини таъминлаш доирасида маҳаллаларда ҳуқуқбузарликларнинг барвақт олдини олиш бўйича аниқ чора-тадбирлар белгиланди. Хусусан, Шофиркон туманидаги барча маҳаллаларда “Хавфсиз шаҳар” консепсияси асосида мингдан ортиқ видеокузатув камералари ўрнатилиши режалаштирилган.

2025 йил давомида ички ишлар органлари ташаббуси билан 156 та замонавий видеокузатув камераси ўрнатилди, ҳозирда эса яна 79 та камера ўрнатилиши кутилмоқда.

Ҳисобот якунида туман Ички ишлар бўлими бошлиғи томонидан ёшлар орасида жиноятчилик ва ҳуқуқбузарликларнинг олдини олиш бўйича амалга оширилаётган профилактик чора-тадбирлар келгусида ҳам изчил давом эттирилиши, замонавий технологиялар жорий этилиши ҳамда барча масъул идоралар ҳамкорлиги кучайтирилиши таъкидланди.

Шунингдек, амалга оширилаётган тадбирлар жиноятчиликни барвақт олдини олиш ва ёшларни соғлом, баркамол авлод этиб тарбиялашга хизмат қилиши қайд этилди.