Сирдарё вилояти Сайхунобод тумани ҳокимлиги

Сайхунобод тумани Мактабгача ва мактаб таълими бўлими томонидан туманда жорий йилда амалга оширилаётган кенг кўламли таъмирлаш ва қурилиш ишлари билан танишиш мақсадида Пресс-тур ташкил этилди. Унда маҳаллий ОАВ вакиллари, ижтимоий тармоқлар фаоллари ва жамоатчилик вакиллари иштирок этдилар.

Пресс-тур давомида журналист ва блогерлар туман ҳудудидаги бир нечта таълим муассасаларига ташриф буюриб, айни пайтда олиб борилаётган қурилиш-таъмирлаш ишларини кўздан кечиришди.

Биринчи манзил сифатида 7-сонли мактабгача таълим ташкилотларига ташриф уюштирилди. Бу масканда болажонлар учун қулай, хавфсиз ва замонавий шарт-шароитларни яратиш мақсадида кенг кўламли мукаммал таъмирлаш ишлари олиб борилаётгани таъкидланди. Бинолар фасадларидан тортиб, ички муҳитгача тўлиқ янгиланмоқда. Айниқса, иситиш тизимлари, санитария-гигиена ҳолатлари ва ўқув-машғулот хоналари замонавий стандартларга мослаштирилаётгани диққатга сазовор бўлди.

Шундан сўнг, пресс-тур иштирокчилари тумандаги қурилиш ишлари кетаётган умумтаълим мактабига йўл олишди. Бу ерда ҳам қурилиш ишлари жадаллик билан олиб борилмоқда. Мактаб биноси замонавий лойиҳа асосида реконструкция қилиниб, ўқувчиларга янада кенгроқ, ёруғ ва қулай шароитлар яратилмоқда. Шу билан бирга, спорт заллари, овқатланиш блоклари ва кутубхоналар ҳам тўлиқ таъмирдан чиқарилиши режалаштирилган.

Ташкил этилган пресс-тур нафақат таълим тизимидаги ўзгаришлар билан таништириш, балки бу борадаги шаффофликни таъминлаш, жамоатчилик назоратини кучайтириш ва ижтимоий фаолликни оширишга хизмат қилди. ОАВ вакиллари томонидан берилган саволларга мутасадди раҳбарлар жойида жавоб бериб, ишлар қамрови, муддати ва сифат даражаси бўйича атрофлича маълумотлар тақдим этдилар.