Сайхунобод туманида “Инсон” ижтимоий хизматлар маркази фаолияти, шунингдек, аҳолини давлат томонидан кафолатланган ижтимоий хизмат ва ёрдамларни олишида яқиндан кўмаклашиш борасидаги ишлар билан кенг жамоатчилик вакилларини таништириш мақсадида пресс-тур
2025-05-20 10:05:00 / Янгиликлар
Унда иштирокчилар “Инсон” ижтимоий хизматлар маркази биносида яратилган шарт-шароитлар, кўрсатилаётган хизмат турлари ва Ижтимоий ҳимоя миллий агентлиги томонидан аҳолига таклиф этилаётган янги таклифлар билан таништирилди.
Қайд этилишича, Сайхунобод туманида “Инсон” ижтимоий хизматлар маркази ва 19 нафар ижтимоий ходим орқали маҳаллаларда аҳолининг ижтимоий ҳимояга муҳтож қатламига давлат томонидан кафолатланган хизмат ва ёрдамлар кўрсатиб келинмоқда.
Жумладан, 2024-йилда 5 270 нафар фуқарога ижтимоий хизматлар кўрсатилган бўлса, жорий йилнинг 5 ойи давомида 4 655 нафар фуқаролар ижтимоий хизматлардан фойдаланган.
"Ўзгалар парваришига муҳтож бўлган ёлғиз яшовчи ҳамда ёлғиз кексалар ва ногиронлиги бўлган шахсларнинг реестри"да турган шахслар 36 нафарни ташкил этиб, уларга 3 нафар ижтимоий ходим ассистенти томонидан ижтимоий-маиший хизматлар кўрсатиб келинмоқда.
Шунингдек, 157 нафар муҳтож шахсларни протез-ортопедия мосламалари ва реабилитация қилишнинг техник воситалари билан таъминлаш мақсадида қиймати 196 млн сўмлик маҳсулотлар билан таъминланган.
118 нафар ногиронлиги бўлган фуқаролар таълим, спорт ва ишга жалб қилинган. 21 нафар етим болалардан 3 нафари 2025 йилда уй-жой билан таъминланади ва суҳбат асосида имтиёзли равишда олий таълим муассасаларига ўқишга қабул қилинади.
“Камбағалликдан фаровонлик сари” дастури доирасида 3 548 та оила сўровномадан ўтказилиб, 1 368 таси реестрга киритилди ва оилаларга индивидуал режалар тузилиб, 1 124 та ижтимоий хизмат амалга оширилди.
Пресс-тур қатнашчилари ўзларини қизиқтирган саволларига “Инсон” маркази масъулларидан атрофлича жавоб олишди.