Сирдарё вилояти Сайхунобод тумани ҳокимлиги

Ҳурматли туман аҳолиси, тадбиркорлар ва соҳа ходимлари!

Бугунги кунда мамлакатимизда инвестицияларни жалб этиш, ташқи савдо фаолиятини кенгайтириш ҳамда бизнес муҳитини яхшилаш йўлида кенг кўламли ислоҳотлар амалга оширилмоқда. Ушбу жараёнларнинг самарадорлиги, энг аввало, тизимда ҳалоллик, шаффофлик ва масъулият тамойилларининг устувор бўлишига боғлиқ.

Афсуски, баъзида айрим ҳолларда коррупсия, манфаатпарастлик ёки хизмат мавқеини суиистеъмол қилиш каби салбий иллатлар мазкур соҳада ҳам учраб туриши мумкин. Бундай ҳолатлар нафақат ишончни йўқотади, балки туманимизнинг иқтисодий ривожланишига, хорижий инвесторлар ишончига ҳам путур етказади.

Шу боисдан, мен барча соҳа ходимлари, тадбиркорлар ҳамда фуқароларни коррупсиянинг ҳар қандай кўринишига кескин қарши туришга, ҳар бир фаолиятда очиқлик ва қонунийликни таъминлашга чақираман.

Тадбиркорлар, сармоядорлар ва ҳамкорлар билан ишлашда адолат, холислик ва хизмат маданиятига қатъий амал қилиш – бу бизнинг бурчимиздир. Ҳар бир мурожаат, лойиҳа ва ташаббус фақат қонуний асосда, шаффоф тартибда кўриб чиқилиши керак.

Ҳурматли фуқаролар!
Агар Сиз коррупсияга оид ҳолатларга дуч келсангиз ёки бундай хатти-ҳаракатлар ҳақида хабардор бўлсангиз, бу ҳақда туман ҳокимлиги, тегишли ҳуқуқни муҳофаза қилувчи органлар ёки Инвестициялар ва ташқи савдо бўлимига хабар беришингизни сўраймиз. Сизнинг фаоллигингиз туманимизни адолатли, ҳалол ва тараққий этган ҳудудга айлантиришда муҳим аҳамият касб этади.

Келинг, барчамиз бир ёқадан бош чиқариб, “Коррупсиясиз муҳит — ишончли инвестициялар гарови” тамойилини ҳаётга татбиқ этайлик!

Ҳурмат билан,
_________________________
Сайхунобод тумани ҳокимининг инвестициялар ва ташқи савдо масалалари бўйича ўринбосари —
Инвестициялар ва ташқи савдо бўлими бошлиғи — Бегалиев Санжар