Республика ишчи гуруҳи томонидан ёшлар масалаларига оид устувор вазифалар муҳокама қилинди
2026-08-03 07:55:00 / Янгиликлар
Сариосиё тумани ҳокимлигида Ёшлар билан ишлаш бўйича Республика ишчи гуруҳи томонидан ҳудудларда амалга оширилаётган ишлар, мавжуд муаммолар ҳамда уларни бартараф этиш юзасидан белгиланган вазифалар муҳокама қилинди.
Унда, Ўзсаноатқурилишбанки АТБ вакили А.Луқмонов, Сариосиё тумани ҳокими Одилжон Яқубов, тегишли ташкилот ва идоралар раҳбарлари ҳамда соҳага масъул мутасаддилар иштирок этди.
Муҳокамалар давомида ёшлар бандлигини таъминлаш, уларнинг бўш вақтини мазмунли ташкил этиш, тадбиркорлик ташаббусларини қўллаб-қувватлаш, касб-ҳунарга ўқитиш, ижтимоий ҳимояга муҳтож ҳамда оталиққа олинган ёшлар билан манзилли ишлаш, шунингдек, "Ёшлар дафтари" доирасидаги вазифалар ижроси таҳлил қилинди.
Шунингдек, масъулларга белгиланган топшириқларни ўз вақтида ва сифатли бажариш, ҳар бир ёшнинг мурожаати ва муаммосига индивидуал ёндашиш ҳамда амалга оширилаётган ишлар натижадорлигини ошириш юзасидан аниқ вазифалар белгилаб берилди.
Таъкидланганидек, ёшлар билан ишлаш тизимини янада такомиллаштириш, уларнинг ҳуқуқ ва манфаатларини таъминлаш, таълим олиши, бандлиги ҳамда жамият ҳаётидаги фаоллигини ошириш устувор йўналишлардан бири бўлиб қолади.