Экополициянинг Сариосиё туман бўлими ғалладан бўшаган майдонларни ёқмасликка чақиради
2026-06-08 08:25:00 / Эълон
Экополициянинг Сариосиё туман бўлими ғалла ўрим-йиғим мавсуми бошланиши муносабати билан туман аҳолиси ва фермер хўжаликларини далаларда қолган сомон-поя қолдиқларини ёқмасликка чақиради. Сомон-поя қолдиқларини ёқиш иқтисодиёт ва атроф-муҳитга кўплаб зарар етказади.
Сомон-поя қолдиқлари ёниши натижасида атмосфера ҳавосига инсон саломатлиги учун зарарли бўлган кўплаб заҳарли газлар ажралиб чиқади. Сомон-поялар ва уларнинг қолдиқлари ёқилган ҳудудларда ер унумдорлигининг кескин пасайиши, тупроқ структураси бузилиши ҳамда ёнғин натижасидаги юқори ҳарорат туфайли макро ва микроелементларнинг йўқ бўлиб кетиши оқибатида экин ерларининг балл бонитети кескин пасаяди.
Сомон-поялар ва уларнинг қолдиқларини ёқишга йўл қўйган ҳуқуқбузарлар ҳамда ер эгаларига нисбатан Маъмурий жавобгарлик тўғрисидаги кодекснинг 88-моддаси (атмосфера ҳавосини муҳофаза қилиш талабларига риоя қилмаслик) 3-қисми билан базавий ҳисоблаш миқдорининг 10 бараваригача (4 120 000 сўм) миқдорда маъмурий жарималар қўлланилади.
Шунингдек, ёнғин содир бўлган ғалла экин майдонларининг ҳар бир гектарига етказилган зарар бўйича амалдаги тартиб асосида иқтисодий чоралар белгиланиши тўғрисида огоҳлантирамиз.