Президент топшириқлари ижроси: Сариосиё туманида пайшанба - “Ёшлар куни” тадбирлари ўтказилди
2026-03-12 15:00:00 / Янгиликлар
Президентимиз ташаббуси билан жорий этилган пайшанба - “Ёшлар куни” муносабати билан бугун Сариосиё туманида қатор тадбирлар ташкил этилди. Шу муносабат билан туман ҳокими Одилжон Яқубов Сариосиё туманидаги 2-сонли политехникумда ўтказилган “Ҳоким ва ёшлар учрашуви”да иштирок этди.
Учрашув аввалида таълим муассасасида ташкил этилган фан тўгараклари, ўқув устахоналари ҳамда ёшларнинг касбий кўникмаларини ошириш бўйича амалга оширилаётган ишлар билан яқиндан танишилди. Шунингдек, ўқувчи-ёшларнинг замонавий билим ва касб-ҳунарларни пухта эгаллаши учун яратилган шарт-шароитлар кўздан кечирилиб, бу борадаги ишларни янада такомиллаштириш юзасидан масъулларга тегишли вазифалар белгилаб берилди.
Шундан сўнг туман ҳокими Одилжон Яқубов ҳамда туман прокурори Б. Олтибоев ёшлар билан очиқ мулоқот ўтказиб, уларнинг таклиф ва ташаббуслари ҳамда мурожаатларини тинглади. Мулоқот давомида ёшлар билан очиқ ва самимий суҳбат қилиб, уларнинг фикр-мулоҳазалари, таклиф ва муаммоларини тинглади.
Учрашувда ёшлар томонидан кўтарилган бандлик, тадбиркорликни қўллаб-қувватлаш, ташаббусларини амалга оширишда кўмаклашиш каби масалаларнинг ҳар бирига масъуллар бириктирилиб, тезкор равишда ўрганиш ва ҳал этиш вазифаси топширилди.
Тадбир якунида политехникум талабалари орасида турли йўналишларда юқори натижаларга эришган фаол ёшлар фахрий ёрлиқлар ҳамда эсдалик совғалари билан тантанали равишда тақдирланди.