Қонун устуворлигини таъминлаш, фуқароларнинг ҳуқуқ ва қонуний манфаатларини ҳимоя қилиш, жамиятда тинчлик ва осойишталикни сақлаш давлат органлари билан бир қаторда ҳар бир фуқаронинг ҳам масъулияти ҳисобланади.
2026-03-02 09:20:00 / Мурожаат
Сариосиё тумани прокурори Ботир Олтибаевнинг ҳуқуқбузарликларнинг барвақт профилактикаси ва жиноятчиликнинг олдини олишга доир туман аҳолисига мурожаати.
Ҳурматли туманимиз фуқаролари!
Қонун устуворлигини таъминлаш, фуқароларнинг ҳуқуқ ва қонуний манфаатларини ҳимоя қилиш, жамиятда тинчлик ва осойишталикни сақлаш давлат органлари билан бир қаторда ҳар бир фуқаронинг ҳам масъулияти ҳисобланади.
Шу муносабат билан, ҳудудимизда ҳуқуқбузарликларнинг олдини олиш, айниқса ўғирлик, фирибгарлик, шунингдек эрта никоҳ ва эрта туғруқ билан боғлиқ салбий ҳолатларга йўл қўймаслик масалаларига алоҳида эътибор қаратиш лозимлигини таъкидлаймиз.
Амалий таҳлиллар шуни кўрсатмоқдаки, кўп ҳолларда ўғирлик ва фирибгарлик фуқароларнинг бепарволиги, ҳушёрликка риоя этмаслиги ҳамда шубҳали вазиятларга етарли эътибор бермаслиги натижасида содир этилмоқда.
Шу боис:
фуқаролар ўз мол-мулкини эҳтиёткорлик билан сақлашлари;
уй-жой, транспорт воситалари ва иш жойларида хавфсизлик чораларига қатъий амал қилишлари;
интернет, ижтимоий тармоқлар ва телефон орқали номаълум шахслар томонидан берилаётган турли таклифларга ишонмасликлари;
шахсий маълумотлар, банк карталари реквизитлари, махфий кодлар ва паролларни бошқа шахсларга ошкор этмасликлари шарт.
Шубҳали ҳолатлар, ноқонуний ҳаракатлар ёки фирибгарлик аломатлари сезилган тақдирда, бу ҳақда зудлик билан ҳуқуқни муҳофаза қилувчи органларга хабар бериш ҳар бир фуқаронинг фуқаролик бурчидир.
Эрта никоҳ ва эрта туғруқ ҳолатлари жамият учун жиддий ижтимоий ва ҳуқуқий оқибатларга олиб келиши мумкин. Бундай ҳолатлар ёшларнинг соғлиғига, маънавий-руҳий ҳолатига, таълим олишига ҳамда келажакда тўлақонли ҳаёт кечириш имкониятларига салбий таъсир кўрсатади.
Шу муносабат билан:
никоҳ фақат қонунчиликда белгиланган ёшга етгандан кейин ва белгиланган тартибда расмийлаштирилиши;
ота-оналар, қонуний вакиллар ҳамда маҳалла фаоллари эрта никоҳ ва эрта туғруқ ҳолатларига йўл қўймасликда масъулиятни тўлиқ ҳис этишлари;
ёшларнинг таълим олиши, касб эгаллаши ва мустақил ҳаётга тайёрланишига устувор аҳамият қаратилиши лозим.
Ҳурматли фуқаролар!
Қонунга ҳурмат, жамият тақдирига бефарқ бўлмаслик ва ўзаро ҳамкорлик орқали ҳар қандай салбий ҳолатларнинг олдини олиш мумкин. Ҳар биримиз ўз масъулиятимизни тўлиқ англаб, ҳуқуқбузарликларга нисбатан муросасиз муносабатда бўлишимиз зарур.
Жиноят ва ҳуқуқбузарлик ҳолатлари ҳақида ўз вақтида тегишли органларга хабар бериш жамият хавфсизлигини таъминлашда муҳим аҳамиятга эга.