Ёшлар куни доирасида Риштон тумани Ёшлар ишлари бўлими ҳамда “Антинарко” ёшлар фронт-офиси ташаббуси билан “Келажак” марказида “Биз гиёҳвандликка қаршимиз!” шиори остида расмлар танлови ҳам ташкил этилди.
Танловдан кўзланган асосий мақсад ёшлар ўртасида соғлом турмуш тарзини кенг тарғиб қилиш, гиёҳвандликнинг салбий оқибатлари ҳақида тушунча бериш ва ёшларнинг ижодий қобилиятларини қўллаб-қувватлашдан иборат бўлди.
Ёшлар ўз ижодий ишлари орқали гиёҳвандликка қарши курашиш, соғлом ва фаровон ҳаёт тарзини тарғиб этувчи ғояларни ифода этдилар. Байрам муносабати билан танлов ғолибларини тақдирлаш маросими ўтказилиб, фаол ёшлар муносиб рағбатлантирилди.
Тадбирлар доирасида ёш авлодга меҳр ва эътибор кўрсатишга қаратилган яна бир эзгу ташаббус — “Илм сари илк қадам — меҳр билан” номли маърифий тадбир ҳам ташкил этилди.
Риштон туманидаги Маданият марказида Ўзбекистон таълим ва фан ходимлари касаба уюшмасининг Риштон туман бўлинмаси Кенгаши томонидан ўтказилган тадбирда мактабгача ва умумий ўрта таълим ташкилотларида фаолият юритаётган касаба уюшмаси аъзоларининг 161 нафар фарзанди иштирок этди.
Болажонлар учун “Ақлли мушук” номли театр асари намойиш этилиб, қизиқарли ва тарбиявий мазмунга бой саҳна кўриниши уларга кўтаринки кайфият бағишлади.
Тадбирнинг энг қувончли лаҳзаларидан бири 161 нафар ўқувчига 12 турдаги ўқув қуроллари ҳамда мактаб сумкалари топширилгани бўлди.
Бугунги кунда ёшларни ҳар томонлама қўллаб-қувватлаш, уларнинг билим олиши, касб-ҳунар эгаллаши, истеъдод ва қобилиятларини намоён этиши учун зарур шарт-шароитларни яратиш муҳим вазифалардан биридир.
Риштонда Ёшлар куни муносабати билан ташкил этилган тадбирлар ҳам ана шу эзгу мақсадларга хизмат қилмоқда. Зеро, ёшларни тинглаш — уларнинг фикрига ҳурмат, ташаббусларини қўллаб-қувватлаш эса келажакка сармоядир.
Бугунги билимли, соғлом, фаол ва ватанпарвар ёшлар — эртанги кун тараққиётининг энг катта таянчидир.