Фарғона вилояти Риштон тумани ҳокимлиги

Аввал хабар берилганидек, туман ҳокимлигида ўтказилган учрашувда 7 гектар майдонни ўз ичига олувчи янги саноат ҳудудини ташкил этиш ҳамда мазкур ҳудудга хитойлик инвесторларнинг ишлаб чиқариш лойиҳаларини жойлаштириш масалалари муҳокама қилинган эди.

Бугун эса ушбу келишувларнинг амалий давоми сифатида Хитойдан янги тадбиркорлар Риштон туманига ташриф буюрди.

Учрашувда Риштон тумани ҳокими Баҳодиржон Холиқов, туман ҳокимининг биринчи ўринбосари Бобожон Иброҳимов ҳамда туман ҳокими ўринбосари Бахтиёр Рўзиалиев иштирок этди.

Хитой томони делегацияси таркибида қуйидаги компаниялар раҳбарлари қатнашди:

🔹 Shandong Xingke Holding Group Co., Ltd. — раиси Инь Пекин;

🔹 China Waterproof Co., Ltd. — раиси Ду Хайтао;

🔹 Shandong Shandi Group Co., Ltd. — раиси Луан Гуанхуэй;

🔹 Shandong Xinjia Energy Technology Co., Ltd. — раиси Цзэн Дуншэн.

Мулоқот давомида Хитой компанияларининг Риштон ҳудудида ишлаб чиқариш лойиҳаларини амалга ошириш имкониятлари, уларни янги саноат ҳудудига жойлаштириш, зарур инфратузилма ва шарт-шароитларни яратиш, шунингдек, келгусидаги ҳамкорлик йўналишлари муҳокама қилинди.

Шунингдек, инвесторларнинг Риштон туманининг иқтисодий салоҳияти, мавжуд имкониятлари ва инвестиция лойиҳалари учун яратилаётган шароитлар билан яқиндан танишиши юзасидан фикр алмашилди.

Мазкур учрашувлар Риштон туманига хорижий инвестицияларни жалб этиш, янги ишлаб чиқариш лойиҳаларини амалга ошириш ва қўшимча иш ўринлари яратиш борасидаги ҳамкорликни янада ривожлантиришга хизмат қилади.