Хотира ва қадрлаш куни муносабати билан ўтганлар хотирасига ҳурмат бажо келтирилди
2026-05-08 16:40:00 / Янгиликлар
Бу сана – Ватан ҳимояси учун жонини фидо қилган, Иккинчи жаҳон урушида ҳалок бўлган ҳамда меҳнат фронтида фидокорона хизмат қилган авлодлар хотирасини ёдга олиш, уларга бўлган эҳтиромни ифода этиш кунидир.
Жорий йилда ҳам Риштон туманида ушбу сана муносиб равишда нишонланди. Туман ҳокимлиги ташаббуси билан ташкил этилган тадбирда туман раҳбарлари, мудофаа, ҳуқуқ-тартибот ва хавфсизликни таъминловчи органлар вакиллари, ташкилот раҳбарлари, нуронийлар, жамоатчилик фаоллари ҳамда ёшлар иштирок этди.
Тадбир аввалида Иккинчи жаҳон уруши қаҳрамонлари Мамадали Топволдиев ва Тўхтасин Аҳмедов қабрларига гулчамбар қўйилиб, ҳалок бўлган жангчилар ва барча ўтганлар хотираси ёдга олинди. Қуръон оятлари тиловат қилиниб, руҳларига бағишлаб дуо қилинди.
Хотира тадбири давомида нутқ сўзлаганлар тинчлик ва эркинлик учун курашган аждодлар жасоратини юксак баҳолаб, бугунги авлод учун уларнинг руҳини улуғлаш катта масъулият эканини таъкидлашди. Шунингдек, мустақил Ўзбекистонда инсон ҳуқуқлари, шаъни ва қадр-қимматини таъминлаш давлат сиёсати даражасига кўтарилгани қайд этилди.
Албатта, Ватан равнақи, тинчлиги ва эркинлиги учун жон фидо қилган фидойилар хотираси юртимизда ҳар доим эъзозланади. Бу эзгу анъаналарни давом эттириш, ёш авлодни ватанпарварлик ва садоқат руҳида тарбиялаш эса ҳар биримизнинг муқаддас бурчимиздир.