Xitoylik investorlar bilan istiqbolli loyihalar yuzasidan kelishuvlar boshlandi
2026-04-29 19:50:00 / Янгиликлар
Qoʻshtepa tumani hokimi A.Abdullayev Xitoylik investorlar delegatsiyasi bilan uchrashuv oʻtkazdi. Unda tumanda investitsiyaviy hamkorlikni kengaytirish, yangi ishlab chiqarish quvvatlarini tashkil etish va istiqbolli loyihalarni amalga oshirish masalalari muhokama qilindi.
Muloqot davomida gaz oʻchirgichlar ishlab chiqarish, toʻquvchilik yoʻnalishini rivojlantirish hamda yuk tashish tizimida foydalaniladigan paddon mahsulotlari ishlab chiqarishga doir loyihalar yuzasidan dastlabki kelishuvlarga erishilgani taʼkidlandi. Ushbu loyihalar hudud sanoat salohiyatini oshirish, yangi ish oʻrinlari yaratish va eksport imkoniyatlarini kengaytirishga xizmat qilishi qayd etildi.
Shuningdek, uchrashuvda traktor ishlab chiqarish boʻyicha yirik loyiha yuzasidan ham fikr almashildi. Mazkur loyiha doirasida Xumdon MFY hududidan 1,5 gektar yer maydoni ajratilib, ayni paytda qurilish ishlari boshlanmoqda.
Tomonlar oʻzaro manfaatli hamkorlikni yanada rivojlantirish, loyihalarni aniq reja va puxta yondashuv asosida bosqichma-bosqich amalga oshirish muhimligini taʼkidladilar. Uchrashuv yakunida istiqbolli tashabbuslar yuzasidan muzokaralarni davom ettirish va kelgusidagi vazifalarni birgalikda belgilab olishga kelishib olindi.
